एजेन्सी – प्रशिक्षक जिनेदिन जिदानको रोजाइमा पर्न नसकेपछि स्पेनिस महारथी रियल म्याड्रिडका डिफेन्डर अल्भारो ओड्रीओजोला ६ महिना लोनमा जर्मन च्याम्पियन बायर्न म्युनिखमा अनुबन्धित भएका छन् ।

स्पेनको राष्ट्रिय टोलीमा नियमित पर्दै आएका भएपनि क्लबमा भने उनले निकै संघर्ष गर्नुपरको छ । जारी सिजन उनले जम्मा ५ पटक रियलको टोलीमा खेलेका छन् । सम्भावित २८ खेलमध्य उनी १७ पटक टोलीमा नै पर्न सकेका छैनन् । उनले बायर्नमा भने मैदानमा खेल्ने समय पाउने अपेक्षा राखेका छन् ।

अल्भारोले जुनमा हुने युरोपेली च्याम्पियनसिपलाई लक्षित गर्दै यो कदम चालेका हुन् । रियलमा नै रहँदा उनले क्लबमा खेल्न नपाएपछि राष्ट्रिय टोलीमा पर्न कठिन हुने बुझेका थिए । राष्ट्रिय टोलीका प्रशिक्षक लुइस एन्रिकेले यसअघि पनि उनलाई टोलीमा राखेका थिए । उनी सन् २०१८ को फिफा विश्वकपमा स्पेनको राष्ट्रिय टोलीमा समेत रहेका थिए ।

अल्भारोले सन् २०२४ सम्मका लागि रियल म्याड्रिडमा सम्झौता गरेका छन् । जिदानको मन जित्न असफल रहेका उनले अर्को सिजन पनि खेल्न पाउने सम्भावना कम छ । रियलबाट लोनमा बोरुसिया डर्टमुन्ड पुगेका अक्रफ हाकिमी पनि क्लब फर्किएसँगै प्रतिस्पर्धा उच्च विन्दुमा पुग्नेछ । रियलमा हाल पनि स्पेनका पहिलो रोजाईका डिफेन्डर ड्यानी कार्भाजल खेलिरहेका छन् ।

अल्भारो सन् २०१८ मा रियल सोसीडाडबाट ४० मिलियन युरोमा रियल आएका थिए । उनले मैदानमा भने खासै प्रभाव जमाउन सकेका छैनन् । रियलमा पहिलो सिजन २२ खेल खेल्दै १ गोल र ९ असिस्ट दिएका उनले यस सिजन भने ५ खेलमा १ असिस्ट मात्र दिएका छन् ।