काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिगमा आज (मंगलबार) दशौं  राउन्ड अन्तर्गत अन्तिम दिन एक खेल हुँदैछ । दिनको एकमात्र खेलमा न्युरोड टिम (एनआरटी) र एनआइविइल फ्रेन्ड्स क्लबबीच प्रतिस्पर्धा हुदैछ । खेल सातदोबाटोस्थित एन्फा कम्प्लेक्सको खेल मैदानमा दिउँसो ३ बजे हुनेछ ।

एनआरटी र फ्रेन्ड्स जित निकाल्दै शीर्ष ६ भित्रको लक्ष्यमा हुनेछ । एनआरटी छैटौ जित तथा फ्रेन्ड्स चौथो जितको खोजीमा हुनेछ । पछिल्लो खेलमा च्यासललाई १–० ले पराजित गरेको फ्रेन्ड्स उच्च मनोवलका साथ मैदानमा उत्रनेछ । सुरुवाती चरणमा कमजोर शुरुवात गरेको फ्रेन्ड्सले पछिल्लो खेलमा लगातार उच्च प्रदर्शन गर्दै आइरहेको छ ।

चार ब्राजिलियन (तीन खेलाडी र एक प्रशिक्षक) को साथ पाएको फ्रेन्ड्सले मनाङलाई बराबरीमा रोक्दा थ्री स्टारलाई १–० ले स्तब्ध पारेको थियो । भारतीय खेलाडी उत्तम राईले लगातर निर्णायक भूमिका खेल्दै आएका छन् । फ्रेन्ड्स एनआरटीलाई हराउँदै नवौं स्थानमा उक्नल चाहन्छ । फ्रेन्ड्स ११ अंकसहित तालिकाको १०औं स्थानमा छ ।

यता, एनआरटी पनि फ्रेन्ड्सलाई पराजित गर्दै टप सिक्सको यात्रालाई मजबुत बनाउन चहान्छ । पहिलो रोजाईका फरवार्ड राजेश परियारसहित सरोज तामाङ, प्रकाश बुढाथोकी लगायतको चोटले एनआरटिलाई समस्या भने परेको छ । एनआरटी १५ अंकसहितसातौं स्थानमा छ । जितले एनआरटी शीर्ष चारमा पुग्नेछ ।