अर्जुन कार्की, बागलुङ

आयोजक बागलुङले दोस्रो मेयर कप राष्ट्रिय फुटबल प्रतियोगिताको उपाधि जितेको छ । उदयपुरको चौदण्डीगढी नगरपालिकालाई ५–२ ले पराजित गर्दै बागलुङ च्याम्पियन बनेको हो ।

बागलुङका लागि उत्तम गुरुङले २ ,कप्तान प्रमेश थापा, ध्रुब घिमिरे र गोविन थापा समान १ गोल गरे । चौदण्डीगढीका लागि दुवै गोल कप्तान शरद राईले गरे ।

सुरुवातदेखि आक्रमक खेल प्रस्तुत गरेको बागलुङले दोस्रो मिनेटमा कप्तान प्रमेश थापाको गोलबाट अग्रता लिएको थियो । चौदण्डीगढीका डिफेन्डरले पेनाल्टी बक्समा बल क्लियर गर्न नसकेपछि प्राप्त बलमा प्रमेशले गोल गरेका थिए ।

बागलुङको लागि दोस्रो गोल २१ औं मिनेटमा ध्रुबले गरे । पेनाल्टी बक्स बाहिरबाट प्रहार गरेको बलले गोलमा परिणत भएको थियो । खेलको २५ औं मिनेटमा चौदण्डीगढीको लागि कप्तानले पेनाल्टीमा गोल गर्दै खेललाई २–१ को अवस्थामा पुर्याए ।

गोलकिपर किपर विट भएको अवस्थामा बागलुङका जिवन गुरुङले गोललाइनमा बल ह्यान्ड गरेपछि चौदण्डीगढीले पेनाल्टी पाएको थियो । ३४ औं मिनेटमाले फ्रिकिमका गोल गरेपछि बागलुङ ३–१ ले अगाडि लाग्यो ।

दोस्रो हाफमा पनि आफ्नो आक्रमक रणनीतिलाई जारी राखेको बागलुङले ४९ औं मिनेटमा गोविनले गोल गरे । खेलको ७५ औं मिनेटमा बागलुङका डिफेन्डर निशान थापाले डिबक्समा फाउल गरेपछि प्राप्त पेनाल्टीमा चौदण्डीगढीका कप्तान शरदले गोल गरेपछि ४–२ को अवस्थामा पुग्यो । ७७ औं मिनेटमा बागलुङका उत्तमले अर्को गोल गर्दै टोलीको जित पक्का गरे ।

उपाधिसहित बागलुङले ३ लाख र चौदण्डीगढीले २ लाख रुपैयाँ प्राप्त गरे । सेमिफाइनल पुग्ने भीमाद नगरपालिका तनहुँ र बेनी नगरपालिका म्याग्दीले समान ६० हजार रुपैयाँ प्राप्त गरे । बागलुङका उपकप्तान तथा डिफेन्डर निशान थापा प्रतियोगिताका सर्वोत्कृष्ट खेलाडी घोषित भए र उनले १० हजार रुपैयाँ प्राप्त गरे ।

उच्च गोलकर्ता र उत्कृष्ट फरवार्ड बागलुङका ध्रुव घिमिरे, उत्कृष्ट गोलकिपर बागलुङका सौगात खड्का, उत्कृष्ट डिफेन्डर जीवन गुरुङ र उत्कृष्ट मिडफिल्डर उत्तम गुरुङ घोषित भए । उत्कृष्टले समान ५ हजार रुपैयाँ प्राप्त गरे।

बागलुङ नगरपालिकाको आयोजना र जिल्ला फुटबल संघ बागलुङको समन्वयमा भएको उक्त प्रतियोगितामा ९वटा नगरपालिका प्रतिस्पर्धा गरेका थिए । नाम दर्ता गराएपनि दाङको तुलसीपुर उपमहानगरपालिका सहभागी भएन ।

नगरपालिकाले २०७४ सालमा प्रदेश नम्बर ४ स्तरीय मेयरकप प्रतियोगिता संचालन गरेको थियो । नगरपालिकाले शहिद दिवसको अवसरमा नगरपालिकाहरुबीच आत्मिय भावना बनाउन र खेलकुदको विकासको लागि प्रतियोगिता सुरु गरेको जनाएको थियो । पहिलो प्रतियोगितामा वालिङ नगरपालिका स्याङ्जाले उपाधि जितेको थियो ।