धनगढी (हाम्रो खेलकुद) – रुपन्देहीको गोर्खा ब्वाइज क्लब सर्वाधिक पुरस्कार राशीको नेपाल आइस खप्तड गोल्डकप फुटबल प्रतियोगिताको क्वार्टरफाइनलमा पुगेको छ । बुटवलको सुनौलो संगमलाई टाइब्रेकरमा ५–३ ले हराउँदै गोर्खा ब्वाइज अन्तिम आठमा पुगेको हो ।

निर्धारित ९० मिनेटको खेल गोलरहित बराबरीमा टुंगिएपछि टाइब्रेकरमा खेलको निर्णय भएको थियो । गोलकिपर मनोज गुरुङले मोहन थापाको पेनाल्टी रोकेपछि गोर्खा ब्वाइजको अघिल्लो चरणको यात्रा पक्का भएको थियो ।

धनगढी रंगशालामा पेनाल्टी सुटआउटमा गोर्खा ब्वाइजका लागि हरि कठायत, अनिष तामाङ, रन्दिप पौडे, निशान न्यौपाने र कप्तान उत्तम गुरुङले गोल गरे । सुनौलो संगमका रञ्जित थापा, अजित थापा र शंकर राई गोल गर्न सफल भए ।

मोहनको पेनाल्टी गोलकिपर मनोजले रोकेका कारण टोलीले पाँचौं पेनाल्टी हान्नै परेन । गोलकिपर मनोज खेलको म्यान अफ दी म्याच घोषित भए र उनले १० हजार रुपैयाँ प्राप्त गरे । गोर्खा ब्वाइजले क्वार्टरफाइनलमा यति हिमालयन शेर्पाको सामना गर्नेछ ।

सुदूरपश्चिम ११ स्पोर्टस क्लबको आयोजनामा जारी प्रतियोगितामा मंगलबारबाट क्वार्टरफाइनल खेल सुरु हुनेछन् । नेपाल एपिएफ क्लब, भारतको कन्चनजंगा एफसी र नव जागृती क्लब यसअघि नै क्वार्टरफाइनल पुगिसकेको छन् ।

आयोजक टोली, नेपाल पुलिस क्लब, रुस्लान थ्री स्टार क्लब र संकटा क्लबले सोझै क्वार्टरफाइनलमा प्रवेश पाएका छन् । प्रतियोगिताको विजेताले २१ लाख १ रुपैयाँ र दोस्रो हुने टोलीले १० लाख १ रुपैयाँ प्राप्त गर्नेछ ।