काठमाडौं (हाम्रो खेलकुद)– दुई विभागिय टोली त्रिभुवन आर्मी क्लब र नेपाल पुलिस क्लब नवलपुरमा जारी राइनो कप फुटबल प्रतियोगिताको उपाधिका लागि भिड्दैछन् ।

यता फाइनल खेल्दै गरेको पुलिसको अर्को टोली धरानमा जारी बुढासुब्बा गोल्डकपमा पनि सेमिफाइनल पुगेको छ । पुलिसले बिहीबार फाइनल प्रवेशका लागि लिग च्याम्पियन सानमिगल मछिन्द्र क्लबको सामना गर्नेछ । आर्मी भने झापाको झिलझिलेमा आइतबार सम्पन्न सताक्षी गोल्डकपको सेमिफाइनलमा मछिन्द्रसँग नै पराजित भएको थियो । फाइनलनमा रुस्लान थ्री स्टार क्लबलाई हराउँदै मछिन्द्रले सताक्षी गोल्डकप जितेको थियो ।

नवलपुरको मध्यबिन्दु रंगशालामा दिउँसो २ः३० बजे दुई विभागिय टोलीबीच फाइनल हुने बताइएको छ । आर्मी स्टारहरु भरत खवास, जर्ज प्रिन्स कार्की, नवयुग श्रेष्ठ, गोलपिकर विकेश कुथु विना राइनो कप खेलिरहेको छ । पुलिसका पनि पहिलो रोजाईका खेलाडी बुढासुब्बा खेलिरहेका छन् ।

अर्को ए डिभिजन टोली यति हिमालयन शेर्पालाई ५–१ ले हराउँदै आर्मी अन्तिम दुईमा पुगेको थियो । पुलिसले भने मंगलबार मात्र साविक विजेता च्यासल युथ क्लबलाई २–० ले निराश पार्दै उपाधि नजिक पुगेको थियो । पुलिस सेमिफाइनल जितेको २४ घन्टा नबित्दै फाइनल खेल्ने तयारीमा रहेको छ । राइनो कपको विजेताले १० लाख र दोस्रो हुने टोलीले ५ लाख रुपैयाँ प्राप्त गर्नेछन् ।