काठमाडौं (हाम्रो खेलकुद) – राष्ट्रिय महिला टोली फरवार्ड सावित्रा भण्डारीले राष्ट्रिय पुरुष फुटबल टोलीका कप्तान एवंम् गोलकिपर किरण चेम्जोङले खेल्ने भारतीय (आई) को आजको खेल हेर्ने भएकी छिन् ।

किरण पन्जाब एफसीबाट आई लिग खेल्दै आएका छन् । पन्जाबले इएमएस कर्पोरेसन रंगशालामा आज साँझ भारतीय समय अनुसार ७ः१५ बजे सावित्रा आबद्ध भएको गोकुलम केरला एफसीको पुरुष टोलीसँग प्रतिस्पर्धा गर्दैछ ।

सोही खेलका दौरान भारतीय महिला लिग (आईडब्लूएल) च्याम्पियनको ट्रफीसहित खेलाडीको र्याली गरिने भएकोले त्यसमा भाग लिन सावित्रा शुक्रबार भारत पुगेकी थिइन् ।

गोकुलम र पन्जाबको खेलको मध्यान्तरमा विजयोत्सव मनाउने क्रममा खेलाडीका साथमा ट्रफी प्रदर्शन गरिने बताइएको छ । गोकुलमलाई च्याम्पियन बनाउन सावित्राको भूमिका महत्वपूर्ण रहेको थियो । क्रिप्सा एफसीलाई ३–२ ले हराउँदै सावित्रा सम्मिलित गोकुलम केरला एफसीले दुई साताअघि लिग उपाधि जितेको थियो ।

सावित्राको निर्णायक गोलमा गोकुलम च्याम्पियन बनेको थियो । २–२ को बराबरीको अवस्थाबाट सावित्राले खेल सकिन ३ मिनेट बाँकी रहँदा निर्णायक गोल गर्दै टोलीलाई च्याम्पियन बनाएकी हुन् । लिग अवधिभर गोकुलमको सबै जितमा सावित्रा केन्द्रमा रहिन् ।

आइलिगमा किरण सम्मिलित पञ्जाब २१ अंकसहित दोस्रो स्थानमा छ भने सातौं स्थानमा रहेको गोकुलमको १७ अंक छ । शीर्ष स्थानमा रहेको मोहन बगानको ३२ अंक छ ।