काठमाडौं (हाम्रो खेलकुद) –राष्ट्रिय फुटबल टोलीका कप्तान एवंम् गोलकिपर किरण चेम्जोङ सम्मलित पन्जाब एफसी भारतीय (आई) लिगमा शनिबार बराबरी खेलेको छ । इएमएस कर्पोरेसन रंगशालामा भएको खेलमा पन्जाबले गोकुलम केरला एफसीसँग १–१ को बराबरी खेलेको थियो । किरणको टोलीले खेलमा लिएको अग्रता जोगाउन नसक्दा बराबरीमा चित्त बुझाउनु परेको थियो ।

३४ औं मिनेटमा एसिर पेरिकको गोलमा पन्जाबले अग्रता लिएको थियो । तर गोकुलमका नाथनिले ६३ औं मिनेटमा बराबरी गोल फर्काएका थिए । बराबरीपछि पनि पन्जाब २२ अंकका साथ दोस्रो स्थानमा यथावत छ । १४ खेलमा पन्जाबले ५ मा जित ७ मा बराबरी र २ खेलमा हार बेहोरेको छ ।

पन्जाब १८ अंकका साथ सातौं स्थानमा छ । टोलीले १३ खेलमा ५ जित ३ बराबर र ५ खेलमा हार बेहोरेको शीर्ष स्थानको मोहन बगानले १३ खेलमा ३२ अंक जोडेको छ । शनिबारको खेलमा किरण पुरा समय खेलेका थिए । उनको खेल राष्ट्रिय महिला फुटबल टोलीकी फरवार्ड सावित्रा भण्डारीले हेरेकी थिइन् ।

सोही खेलका दौरान भारतीय महिला लिग (आईडब्लूएल) च्याम्पियनको ट्रफीसहित खेलाडीको र्याली गरिएको थियो । सावित्रा सम्मलित गोकुलमले दुई साता अघि आईडब्लूएल जितेको थियो । त्यहि विजयत्सवमा सामेल हुन शुक्रबार त्यहाँ पुगेकी थिइन् ।

गोकुलमलाई च्याम्पियन बनाउन सावित्राको भूमिका महत्वपूर्ण रहेको थियो । क्रिप्सा एफसीलाई ३–२ ले हराउँदै सावित्राले निर्णायक गोल गरेकी थिइन् । लिग अवधिभर गोकुलमको सबै जितमा सावित्रा केन्द्रमा रहिन् । उनले लिगमा १६ गोल गर्दै उच्च गोलकर्ताको उपाधि जितेकी थिइन् ।