एजेन्सी – खेलको अन्त्यतिर मार्काेस अलन्सोले गोल गरेपछि इंग्लिस प्रिमियर लिगमा लन्डन क्लब चेल्सी हारबाट जोगिएको छ । चेल्सीले घरेलु टोली बर्नमाउथसँग २–२ गोलको बराबरी खेलेको हो ।

शुरुवाती अग्रता लिएर पनि खेलमा पछि परेको चेल्सीले खेल सकिन ५ मिनेट बाँकी रहँदा गोल गर्दै हार टारेको थियो । बर्नमाउथका जेफर्सन लेर्मा र जोसुआ किङले गोल गरे । चेल्सीका लागि दुवै गोल मार्काेस अलन्सोले गरे ।

खेलको ३३औं मिनेमा अलन्सोले गोल गर्दै चेल्सीलाई सुरुवाती अग्रता दिलाएका थिए । पहिलो हाफमा १–० को अग्रता लिएको चेल्सीले दोस्रो हाफमा चार मिनेटको अन्तरमा दुई गोल खाएपछि खेलमा २–१ ले पछि परेको थियो ।

५४औं मिनेटमा लेर्माले गोल गर्दै घरेलु टोलीलाई १–१ गोलको बराबरीमा ल्याए । ५७औं मिनेटमा जोसुआ किङले गोल गर्दै बर्नमाउथलाई २–१ को अग्रता दिलाए । खेल सकिन ५ मिनेट बाँकी रहँदा अलन्सोले व्यक्तिगत दोस्रो तथा टोलीका लागि दोस्रो गोल गर्दै खेललाई २–२ गोलको बरारबरीमा ल्याए ।

त्यसपछि थप गोल निस्कन नसक्दा खेल २–२ गोलको बराबरीमा सकियो । बराबरीसँगै चेल्सीले तेस्रो स्थानको लेस्टर सिटीसँगको अंक दुरी छोट्याउने मौका गुमाएको छ । चेल्सीको २८ खेलबाट ४५ अंक छ । बर्नमाउथ २७ अंक जोडेर रेलिगेसन जोनको १८औं स्थानमा छ ।

अन्य नतिजा

ब्राइटनविरुद्ध क्रिस्टल प्यालेस (०–१)

न्युु क्यासलविरुद्ध बर्नली (०–०)

वेस्टह्यामविरुद्ध साउथह्याम्पटन (३–१)