काठमाडौं (हाम्रो खेलकुद)– भारत सिलगुढीको कन्चनजंगा एफसी सर्लाहीको बागमतीमा जारी चौथो राजर्षी जनक कप फुटबल प्रतियोगिताको फाइनलमा पुगेको छ ।

ए डिभिजन टोली प्रभु बैंक जावलाखेल युथ क्लबलाई शनिबार टाइब्रेकरमा ३–१ ले हराउँदै कन्चनजंगा उपाधि नजिक पुगेको थियो । अब टोली फाइनलमा नेपाल पुलिस क्लबको सामना गर्नेछ । साविक विजेता सुदूरपश्चिम ११ स्पोर्टस क्लबलाई शुक्रबार ३–१ ले हराउँदै पुलिस अन्तिम दुईमा पुगेको थियो ।

पुलिसको अर्को टोली पोखरामा शनिबार भएको आहा रारा गोल्डकप फुटबल प्रतियोगिताको फाइनलमा पराजित भएको थियो । पुलिस नेपाल आयल निगम मनाङ मस्र्याङ्दीसँग टाइब्रेकरमा ४–३ ले पराजित भएको थियो ।

पुलिसले एकै पटक बागमती र पोखरामा प्रतिस्पर्धा गरिरहेको छ । सन्तोष श्रेष्ठ स्मृति मैदानमा शनिबार जावलाखेल र कन्चनजंगाले निर्धारित समय १–१ को बराबरी खेलेका थिए ।

कन्चनजंगा गत महिना धनगढीमा सम्पन्न नेपाल आइस चौथो सुदूरपश्चिम खप्तड गोल्डकप फुटबल प्रतियोगिताको क्वार्टरफाइनलमा आयोजक सुदूरपश्चिम ११ स्पोर्टस् क्लबसँग पराजित भएको थियो ।

बागमती नगरपालिका र बागमती युवा क्लबको संयुक्त आयोजनमा जारी प्रतियोगिताको विजेताले उपाधिसहित १० लाख रुपैयाँ प्राप्त गर्नेछ ।