पोखरा (हाम्रो खेलकुद) – गार्डेन कप फुटबल प्रतियोगिताको दोस्रो संस्करणको समापनसँगै आयव्यय सार्वजनिक गरिएको छ ।

गार्डेन युवा क्लबको आयोजनामा भएको प्रतियोगिताबाट ८ लाख १३ हजार रुपैयाँ बचत भएको आयोजकले जनाएको छ । आर्थिक पारदर्शिता गराउन मंगलबार पोखरामा पत्रकार सम्मेलन गरि क्लबले प्रतियोगिताको आयव्यय सार्वजनिक गरेको हो ।

प्रतियोगिताबाट १४ लाख ५८ हजार ३ सय ९० रुपैयाँ आम्दानी भएको थियो । जसमा ६ लाख ४५ हजार ३ सय ९० खर्च तथा ८ लाख १३ हजार रुपैयाँ बचत भएको क्लबका कोषाध्यक्ष दिलिप गुरुङले जानकारी दिए । त्यस्तै क्लबका अध्यक्ष विनोद गुरुङले प्रतियोगिताबाट बचत भएको रकमले तेस्रो संस्करणबाट भने क्लब स्तरीय फुटबल प्रतियोगिता गराउने योजना भएको बताए ।

‘ हामिले अब ११ ए साइड फुटबल प्रतियोगिता गराउने छौं । बचत भएको रकम सामाजिक कार्यका साथै सोहि प्रतियोगितामा प्रयोग गर्नेछौं,’ गुरुङले भने । प्रतियोगिताको लागि पोखरा महानगरपालिका वडा नं ११ ले निकै सहयोग गरेको बताउँदै देश विदेशबाट समेत सहयोग गर्ने सबैलाइ धन्यवाद व्यक्त गरे ।

सोहि क्रममा बोल्दै पोखरा महानगरपालिका वडा नम्बर ११ का वडाध्यक्ष मोहन बास्तोलाले क्लबले निकै उत्कृष्ट कार्य गरेकोमा आगामी वर्ष ५ लाख रुपैयाँ सहयोग गर्ने प्रतिवद्धता व्यक्त गरे । ‘ यसपटकको प्रतियोगितालाई वडास्तरिय बजेटबाट १ लाख ५० हजार सहयोग गरेका थियौं,आगामी संस्करणमा ५ लाख सहयोग गर्नेछौं,’ बास्तोलाले भने । वडामा आयोजित प्रतियोगिता भव्य रुपमा सफल भएको दावी गर्दै क्लबले युवाहरूलाई सामाजिक उत्तरदायित्व बहन गर्न सिकाएको बताए ।

फागुन १२ देखि १७ गते सम्म पोखराको मणिपाल शिक्षण अस्पताल खेल मैदानमा भएको प्रतियोगितामा संगम एफसी विजेता तथा मेरो नेपाल उपविजेता बनेका थिए ।