काठमाडौ.( हाम्रो खेलकुद)– कोरोना भाइरस कोभिड १९ को विश्वव्यापी असरले उत्पन्न परिस्थितिलाई ध्यानमा राख्दै नेपाली राष्ट्रिय फुटबल टोलीका महिला र पुरुष खेलाडीले सार्वजनिक अपिल गर्ने क्रममा सबैलाई घरमा रहन आग्रह गरेका छन् ।

पुरुष फुटबल टोलीका कप्तान तथा किरण चेम्जोङले सबैलाई सके सम्म घरमै बस्न र सेनिटाइजसको प्रयोग गर्न आग्रह गरेका छन् । अखिल नेपाल फुटबल संघ(एन्फा) ले फेसबुक पेजमा अपलोड गरेको सन्देशमा किरणसहित रोहित चन्द, सुजल श्रेष्ठ, महिला टोलीका सावित्रा भण्डारी र अन्जली सुब्बाले सन्देश दिएका छन् ।

सावित्राले आफ्नो सन्देशमा भनेकी छिन्, ‘कोराना भाइरसको महामारीले विश्वमा आइपरेको समस्याले एक पटक सबैलाई सोच्न बाध्य बनाएको छ । यसले विश्वमा सयौं मानिसहरुको मृत्यु भइसकेको छ । नेपाल पनि उच्च जोखिममा रहेको विषयलाई मध्यनजर गर्दै सावधानी अपनाउनका लागि सरकारले आग्रह गरेको छ । हामी सबैले सरकारको निर्णयको पालना गरौं । आधिकारिक निकायको सुचनामा मात्र विश्वास गरौं । अनावश्यक हल्लाको पछाडि लागेर आतंकित नबनौं । सबैले आफ्नो र परिवारको ख्याल गरौं । पटक पटक हात धुने बानी बसालौं ।’

गोलकिपर अन्जलीले अहिले पनि नेपालीले कारोनालाई गम्भिरतापूर्वक नलिएको गुनासो गदैै सबैलाई सचेत रहन आग्रह गरेकी छिन् । नेपालले चार महिनाअघि १३ औं दक्षिण एसियाली खेलकुदमा फुटबल तर्फ स्वर्ण जित्दा टोलीका कप्तान रहेको सुजलले सामाजिक सञ्जाल र अन्य माध्यमबाट आएका समाचारमा विश्वास नगर्न र सरकारले दिएको आधिकारिक जानकारीमा विश्वास गर्न, पालना गर्न आग्रह गरेका छन् । रोहितले पनि सरकारले जारी गरेका सुचनालाई पछ्याउन र सोही अनुरुपको व्यवहार गर्न भनेका छन् ।

यसैबीच, ओलम्पियन दीपक विष्टले सामाजिक सञ्चालमार्फत सबैलाई आफ्नो र परिवारको ख्याल राख्न आग्रह गरेका छन् । राष्ट्रिय क्रिकेट टोलीका पूर्व कप्तान पारस खड्का र विनोद दासले पनि यो संकटको घडिमा संयमता अपनाउन र सुरक्षित रहन आग्रह गरेका छन् । चीनबाट सुरु भएको कोराना भाइरसले विश्वका अधिकांश मुलुकमा असर पारिसकेको छ ।

कोरोनाको संक्रमणबाट १४ हजार भन्दा बढी मानिसहरुको मृत्यु भइसकेको छ । इटालीमा मात्र ५ हजार ५ सय भन्दा बढी व्यक्तिको मृत्यु भइसकेको छ । नेपालमा पनि सोमबार मात्र एकजनामा संक्रमण भएको देखिएको स्वास्थ्य मन्त्रालयले जनाएको छ । संक्रमितको टुकु अस्पतालमा उपचार भइरहेको बताइएको छ ।