काठमाडौं (हाम्रो खेलकुद) – दायाँ आँखामा गम्भीर चोट लागेकी उदयपुर बेलका नगरपालिका यु–१६ महिला फुटबल खेलाडी समिक्षा मगरको सम्पूर्ण उपचार खर्च अखिल नेपाल फुटबल संघ (एन्फा) ले बेहोर्ने भएको छ ।

एन्फाका केन्द्रिय सदस्य तथा प्रवक्ता किरण राई आइतबार समिक्षाको उपचार भइरहेको विराटनगरस्थित आँखा अस्पतालमा पुगेर उनको उपचारमा लाग्ने सबै खर्च एन्फाले बेहोर्ने बताएको हुन् । प्रवक्ता राईले समिक्षाको आर्थिक अवस्था कमजोर रहेको र सुरुवातमा समस्या नहोस् भनेर नै एन्फाले प्रारम्भिक चरणमा २५ हजार रुपैया सहयोग गरिएको बताउदै उनको उपचारमा लाग्ने सबै खर्च एन्फाले नै बेहोर्ने बताएको हो ।

‘केही साथीहरुमा समिक्षाको उपचारमा एन्फाले २५ हजार मात्रै सहयोग भन्ने भ्रम परेको छ । त्यस्तो होइन, समिक्षाको उपचारको सम्पुर्ण खर्च एन्फाले बेहोर्नेछ ’ प्रवक्ता राईले भने, ‘हामीले प्रारम्भमा खर्च चलाउन रकम उपलब्ध गराएको हो । यो अन्य खेलाडीमा गराएको थिएन । समिक्षामा नै पहिलोपटक गरिएको हो । उनको परिवारलाई ढुक्क हुन आग्रह र शिघ्र स्वाथ्यलाभको कामना गर्दछु ।’

विराटनगर महानगरपालिकाका मेयर भीम पराजुलीले समिक्षाको उपचारको लासग व्यक्तिगत रुपमा २५ हजार रुपैयाँ सहयोग गर्दै महानगरपालिकाले जुनसुकै सहयोग गर्ने र केही कमजोरी नहुने बताएका छन् । प्रशिक्षक भगवती राना मगरले चिकित्सकका अनुसार समिक्षाको आँखाको दृष्टि फर्कन नसक्ने बताएका छन् ।

प्रशिक्षक रानाले अहिले समिक्षाको आँखाको घाँउको इन्फेक्सनलाई कम गर्ने प्रयास भइरहेको र त्यसपछि अप्रेसनमा लगिने थपिन् । तयारी भइरहेको छ । समिक्षाको गत बैशाख १२ मा उदयपुरस्थित घरको बारीमा काम गर्ने क्रममा ढुङ्गाले लागेर दाहिने आँखामा चोट लागेको थियो । उनले विद्यालयस्तरीय क्विक्स कप खेलेकी थिइन् ।

समिक्षाको उपचारको लागि एन्फासँगै विराट सांग्रिला स्पोर्टिङ क्लबले समान २५ हजार, नेपाली महिला राष्ट्रिय फुटबल टोली र महिला विभाग प्रमुख तथा महिला राष्ट्रिय फुटबल टोलीका पुर्व प्रशिक्षक हरि खड्का र अफिसियलले संयुक्त रुपमा ५० हजार रुपैयाँ पुरस्कार दिने घोषणा गरेको थियो । पुरुष फुटबल टोली, पुरुष साग यु–२३ टोली र ‘ए’ डिभजन क्लब मनाङ–मस्र्याङ्दी क्लबले समिक्षाको उपचारको लागि आर्थिक सहयोग गरेका छन् ।

शनिबार र नेपाली राष्ट्रिय महिला टोलीले समिक्षालाई ५० हजार रुपैया सहयोग गर्ने घोषणा गरेको हो । यस्तै नेपाली राष्ट्रिय पुरुष फुटबल टिमले ३० हजार रुपैया र १३औं दक्षिण एसियाली खेलकुद (साग) मा स्वर्णपदक जित्न सफल नेपाली यु–२३ पुरुष टिमले १० हजार रुपैया, ‘ए’ डिभिजन क्लब नेपाल आयल निगम मनाङ–मस्र्याङ्दी क्लबले ३० हजार रुपैया तथा फुटबल खेलाडी अनिता श्रेष्ठले २६ हजार रुपैया सहयोग गरेका छन् ।