एजेन्सी – बार्सिलोनाका कप्तान लियोन मेस्सीले कोरोना भाइरसका कारण गर्नुपरेको बन्दले सबैलाई कठिन भएको स्वीकार गर्दै छिट्टै फुटबल फर्कने विश्वास गरेका छन् ।

अर्जेन्टिनाका कप्तान समेत रहेका मेस्सी ती खेलाडीमा पर्दछन् जसले घरको बगैंचामा प्रशिक्षणलाई निरन्तरता दिएर आफ्नो फिटनेसलाई कायम राख्ने प्रयास गरेका थिए ।

‘शारीरिक रुपमा म एकदम ठीक छु । घरमा हुँदै पनि मैले अभ्यास गरिरहें यसले मलाई फिट रहि रहन मद्दत गर्यो’, उनले भने, ‘यो बन्दको समय निकै कठिन रह्यो । तर बच्चा र एन्टोनेलासँग समय बितायो । परिवारसँग रमाए । कठिन समय भएपनि परिवारको साथले सहयोग गर्यो ।’

झन्डै दुई महिनादेखिको स्थगनले केहि राम्रो भएको उनले सुनाए । ‘यो विश्रामले हामीलाई केहि फाइदा भएको छ’ , उनले भने, ‘अब प्रतिस्पर्धा कहिलेबाट सुरु हुन्छ त्यो हेरौं । हामीले आफ्नो अवस्था पनि थाहा पाउनेछौं जति बेला प्रतिस्पर्धा हुनेछ ।’

विश्रामपछि पहिलो कदम भने प्रशिक्षण सुरु गर्नु भएको मेस्सीले बताए । ‘अझै पनि सुरुवातका लागि पुरै आत्मविश्वास आइसकेको छैन । हामीले सबै खासे सावधानी अपनाउन जरुरी छ’ , उनले थपे, ‘बन्द रंगशालामा खेल्नु पर्ने अवस्था छ ।’

मेस्सीले व्यक्तिगत रुपमा भने प्रतिस्पर्धामा फर्कन आतुर रहेको सुनाए । ‘हामीलाई थाहा छ अहिले समर्थकलाई रंगशाला आउने अनुमति हुने छैन । प्रशिक्षणमा पनि त्यस्तै छ’, उनले भने, ‘हामी पनि आफ्नो परिवारबाट अलग हुन चाहदैनौं । हेरौ यो सब कसरी अन्त्य हुनेछ ।’

इन्टर मिलानका फरवार्ड लाउटारो मार्टिनेजका विषयमा पनि मेस्सीले खुलेर बोलेका छन् । मेस्सीले कोपा अमेरिकाका क्रममा मार्टिनेजसँग खेलेका थिए । अहिले उनीसँग क्लबको छलफलका विषयमा भने आफुलाई थाहा नभएको मेस्सीले बताएका छन् ।

‘अहिले छलफल कहाँ पुगेको छ मलाई थाहा छैन’, उनले भने, ‘मैले पहिला पनि भनेको छु उनी प्रभावशाली फरवार्ड हुन् । उनी बलियो छन्, राम्रो ड्रिबल गर्छन, गोल गर्छन् । उनी पूर्ण खेलाडी हुन् । तर अब उनी वा अरु खेलाडीका विषयमा के हुन्छ म भन्न सक्दिन ।’

केहि अघि मेस्सीले प्रशिक्षक कीके स्टेनीको नेतृत्वमा च्याम्पियन्स लिग जित्न नसक्ने बताएका थिए । ‘मलाई हाम्रो टोलीमा शंका छैन । हामी ला लिगा र च्याम्पियन्स लिग जित्न सक्छौं’, उनले भनेका थिए, ‘तर अहिले हामी जसरी खेलिरहेका छौं त्यो च्याम्पियन हुने खालको छैन ।’