एजेन्सी – स्पेनिस ला लिगा अन्तर्गत रियल म्याड्रिड र भ्यालेन्सियाबीच जारी खेलको पहिलो हाफ गोलरहित बराबरीमा सकिएको छ ।

खेलको १० औं मिनेटमा घरेलु टोली रियलका फरवार्ड करीम बेन्जेमाको प्रहारलाई गोलरक्षक जास्पर सिलेसेनले बचाए । त्यसको एक मिनेट नबित्दै बेन्जेमाको पासमा इडेन हाजार्डको प्रहारलाई सिलेसेनले उत्कृष्ट डाइभ दिँदै विफल पारे ।

१६ औं मिनेटमा पाहुना टोली भ्यालेन्सिया अग्रता लिनबाट बन्चित भयो । रोड्रीगोले पेनाल्टी क्षेत्र भित्रबाट गरेको शक्तिशाली प्रहारलाई गोलरक्षक थिबाउट कोर्टुवाले हल्का छोएपछि पोस्टमा लाग्दै बाहिरिएको थियो ।

खेलको २१ औं मिनेटमा भ्यालेन्सियाका रोड्रीगो मोरेनोले गोल गरेपनि रेफ्रीले भिडियो असिस्टेन्ट रेफ्री (भीएआर) को सहयोग लिँदै त्यसलाई मान्यता दिएनन् । कार्लोस सोलेरको पासमा रोड्रीगोले गोल गरेपनि बल त्यहाँसम्म पुग्दा अफसाइड रहेका खेलाडीलाई छुँदै गएको रेफ्रीको ठहर थियो ।

२९ औं मिनेटमा ड्यानी कार्भाजल पेनाल्टी क्षेत्रभित्र वन भर्सेस वनको अवस्थामा रहेपनि सिलेसेनले राम्रो बचाउ गरे । ३९ औं मिनेटमा कार्भाजलको क्रसमा बेन्जेमाको हेडरले पोस्टको दिशा लिन सकेन ।

४३ औं मिनेटमा भ्यालेन्सियाका जिओफ्री कोन्डोग्बियाले झन्डै ३० यार्ड टाढाबाट गरेको प्रहारलाई गोलरक्षक कोर्टुवाले सुन्दर बचाउ गरे । त्यसको एक मिनेटपछि क्रुसको कर्नरमा क्यसेमिरोको हेडर सिधै गोलरक्षकको हातमा पुग्यो । इन्ज्युरी समयमा हाजार्डले पेनाल्टी क्षेत्र बाहिरबाट गरेको प्रहार गोलरक्षकले सहजै बचाए ।

भ्यालेन्सियाविरुद्ध जित निकाल्न सकेको अवस्थामा रियलले पुन: शीर्षस्थानको बार्सिलोनासँगको अंक दुरी २ मा छोट्याउने छ । बराबरीले ४ तथा हारले ५ अंकले पछि पर्दै उपाधि यात्रा झिनो बन्नेछ । यस्तोमा रियल निश्चित जितकै लागि खेल्नेछ ।

यो पनि पढ्नुहोस : ‘रोनाल्डो एक्लैले जादु गर्न सक्दैनन्’