प्रिमियर लिगमा आज राति चार खेल

एजेन्सी – इंग्लिस प्रिमियर लिगमा आज (आइतबार) राति ३३औं चरणका विभिन्न चार खेलमा प्रतिस्पर्धा हुँदैछ । च्याम्पियन बनिसकेको लिभरपुल र दोस्रो स्थानको म्यानचेस्टर सिटीले आ–आफ्ना प्रतिद्वन्द्वीसँग प्रतिस्पर्धा गर्नेछन् ।

लिभरपुलले एनफिल्डमा एस्टन भिल्लालाई आतिथ्यता गर्नेछ । खेल नेपाली समयअनुसार राति ९ः१५ बजे हुनेछ । घरेलु मैदानमा लिभरपुल सहज जित निकाल्दै अघिल्लो खेलमा म्यानचेस्टर सिटीसँग बेहोरेको लज्जास्पद हारलाई बिर्सने कोशिसमा हुनेछ ।

यता, भिल्ला लिभरपुलबाट अंक खोस्दै रेलिगेसन बच्ने दाउँमा हुनेछ । लिभरपुललाई पराजित गर्न सके भिल्लाले १६औं स्थानको वेस्टह्यामसँग अंक बराबरी गर्नेछ । भिल्ला २७ अंक जोडेर १८औं स्थानमा छ । लिभरपुलको ८६ अंक छ ।

यस्तै सिटीले साउथह्याम्पटनसँग उसैको मैदानमा खेल्नेछ । दुई टिमबीचको खेल राति ११ः४५ बजे हुनेछ । सिटी घरेलु टोलीलाई हराएर लिभरपुलसँगको अंक दुरी थप छोट्याउने दाँउमा हुनेछ । साउथह्याम्पटन पनि जित निकाल्दै अंक तालिका सुधार गर्न चाहन्छ । सिटीको ६६ अंक जोडेर दोस्रो स्थानमा साउथह्याम्पटन ४० अंक जोडेर १४औं स्थानमा छ ।