एजेन्सी – आधुनिक फुटबलका हस्ती पोर्चुगिज तथा युभेन्टसका सुपरस्टार फरवार्ड क्रिस्टियानो रोनाल्डोले युभेन्टस छाडेर फ्रेन्च क्लब पेरिस सेन्ट जर्मेन (पीएसजी) जाने योजना रहेको बाहिरिएको छ ।

फ्रान्सको रिपोर्टअनुसार कोरोना भाइरस (कोभिड–१९) ले विश्वभर नै महामारीको रुप लिनुभन्दा अघि नै रोनाल्डोले पीएसजी जाने आश्चर्यजनक कदम चाल्दै थिए । तर, कोरोनाका कारण तत्काललाई पुरा नहुने भएको छ । ३५ वर्षे रोनाल्डो २०१८ मा स्पेनिस महारथी रियल म्याड्रिड छाडेर युभेन्टस पुगेका थिए । उनले लगातार दुई सिजन सिरी ‘ए’ जितिसकेका छन् ।

फ्रान्स फुटबलका अनुसार रोनाल्डो युभेन्टसको प्रदर्शनबाट दिक्क थिए । त्यसैले उनले अन्यत्र विकल्पका बारेमा सोचेका थिए । उक्त रिपोर्टअनुसार उनी पीएसजी जाने योजनामा थिए । जहाँ उनले विश्व फुटबलका स्टारहरु ब्राजिली नेयमार र फ्रेन्च फरवार्ड केलियन एमबाप्पेसँग खेल्ने सपना बुनेका थिए । रोनाल्डोको ब्राजिली स्टार नेयमारसँग घनिष्ठ सम्वन्ध रहेको छ । विश्वविजेता एमबाप्पे पनि रोनाल्डोको मन पर्ने खेलाडी हुन् ।

पेरिसले रोनाल्डोको मुटुमा पनि विशेष स्थान ओगटेको छ । जहाँ रोनाल्डोले २०१६ मा घरेलु टोली फ्रान्सलाई हराउदै युरोकप जितेको थियो । रिपोर्टको दावीअनुसार रोनाल्डो गतवर्ष अक्टोवरमा घरेलु मैदानमा लोकोमोटिभ मस्कोविरुद्ध २–१ को जित निकालेको खेलपछि धेरै तनावमा देखिएका थिए। रोनाल्डोले स्कोर गरेनन् र असिस्ट पनि दिएनन् । टोलीबाट सहयोग पनि सोचेजस्तो पाएनन् । उनले यो बुझे कि टुरिनमा म्याड्रिड वा प्रिमियर लिगमा जस्तो आकर्षण छैन ।

त्यसकारण उनी आफुलाई एलिएन्ज एरिनाबाट टाढा जाने योजना बनाएका थिए । पीएसजीले पनि रोनाल्डो अनुबन्धको योजना बनाइसकेको थियो । पीएसजीले यो ‘धेरै सम्भाव्य’ रहेको बुझेको थियो । यद्दपि यो कोरोना महामारीले नष्ट पारिदियो । कोरोनाका कारण विश्व अर्थतन्त्र नै चरम आर्थिक मन्दीमा परेपछि यो एकदमै असम्भव जस्तै बनेको छ ।

कोरोनापछि फुटबल सुरु भएपछि युभेन्टसले एक साताअघि लगातार नवौं पटक सिरी ‘ए’ को उपाधि जितेको थियो । तर, युभेन्टसको प्रदर्शन फितलो बन्यो । उनले सिरी ‘ए’ मा दुई वर्ष बिताउदा ८८ खेलमा ६३ गोल गरे । उनी यो सिजन सिरी ‘ए’ को गोल्डेन बुट जित्नबाट वञ्चित बने । लाजियोका चिरो इम्मोबिलेले ३६ गोल गर्दै युरोप र सिरी ‘ए’ को गोल्डेन बुट जित्न सफल भए ।