एजेन्सी – यूईएफए च्याम्पियन्स लिग अन्तर्गत सिजन २०२०-२१ को समूह चरणको ड्र समाप्त भएको छ । यसपटक प्रतियोगिताको समूह चरणमा नै लिओनेल मेस्सी र क्रिस्टियानो रोनाल्डो आमनेसामने हुने भएका छन् ।

रोनाल्डो सम्मिलित युभेन्टस र मेस्सी कप्तान रहेको बार्सिलोना समूह जी मा रहेका छन् । यी दुईसँग डिनामो किएभ र फेरेन्साव्रोसीले प्रतिस्पर्धा गर्नेछन् । गत सिजनको विजेता बायर्न म्युनिख र एटलेटिको म्याड्रिड पनि एकै समूहमा रहेका छन् ।

अघिल्लो संस्करणमा फाइनलमा पराजित भएको पेरिस सेन्ट जर्मेन यसपटक कठिन समूहमा परेको छ । म्यानचेस्टर युनाइटेड र आरबी लाइप्जिग सम्मिलित यस समूहलाई ग्रुप अफ डेथ को उपमा दिइएको छ । पहिलो पटक च्याम्पियन्स लिग खेलिरहेको इस्तानबुल बसाकसेइर पनि यसै समूहमा छ ।

स्पेनिस च्याम्पियन रियल म्याड्रिडलाई भने केहि सहज समूह परेको छ । रियलसँग युक्रेनको शाख्तार डोनेस्क, इटालीको इन्टर मिलान र जर्मन टोली बोरुसिया मोन्चेनग्लाडबाक रहेका छन् । म्यानचेस्टर सिटीको समुहमा एफसी पोर्टो, ओलाम्पियाकोस र मार्सेले खेल्नेछन् ।

इंग्लिस च्याम्पियन लिभरपुलले आयाक्स, एटलान्टा र पहिलो सहभागिता जनाइरहेको एफसी मिद्त्जल्यान्डको सामना गर्नेछ । अर्को इंग्लिस टोली चेल्सीले सेभिया, क्राज्नोडार र रेन्नेससँग खेल्नेछ । बोरुसिया डर्टमुन्ड, जेनिट सेन्ट पिटर्सबर्ग, लाजियो र क्लब ब्रुगा एकै समूहमा छन् ।

समूह ए : बायर्न म्युनिख, एटलेटिको म्याड्रिड, एफसी साल्जबर्ग, लोकोमोटिभ मस्को

समूह बी : रियल म्याड्रिड, शाख्तार डोनेस्क, इन्टर मिलान, बोरुसिया मोन्चेनग्लाडबाक

समूह सी : एफसी पोर्टो, म्यान्चेस्टर सिटी, ओलाम्पियाकोस, मार्से

समूह डी : लिभरपुल, आयाक्स, एटलान्टा, एफसी मिद्त्जील्यान्ड

समूह ई : सेभिया, चेल्सी, क्राज्नोडार, रेन्नेस

समूह एफ : जेनिट सेन्ट पिटर्सबर्ग, बोरुसिया डर्टमुन्ड, लाजियो, क्लब ब्रुगा

समूह जी : युभेन्टस, बार्सिलोना, डिनामो किएभ, फेरेन्साव्रोसी

समूह एच : पेरिस सेन्ट जर्मेन, म्यानचेस्टर युनाइटेड, आरबी लाइप्जिग, इस्तानबुल बसाकसेइर