एजेन्सी – इंग्लिस प्रिमियर लिगमा लिड्स युनाइटेडले एभर्टनलाई उसकै मैदानमा १–० ले पराजित गरेको छ ।

गुडिसन पार्कमा लिड्सको जितमा राफिन्हाले खेल सकिन ११ मिनेट बाँकी छदा गरेको गोल नै निर्णायक बन्यो । घरेलु टोलीविरुद्ध लिड्सले बल पोजेसनमा समेत पकड बनाएको थियो ।

खेलको पहिलो मिनेटमा नै प्याट्रिक बामफोर्डको पासमा राफिन्हा चुकेका थिए । १०औं मिनेटमा राफिन्हाले अर्काे अवसर खेर फाले । २०औं मिनेटमा क्लिचको क्रसमा कसैको निगरानीमा नरहेका बामफोर्डले गरेको प्रहारलाई एभर्टनका गोलरक्षक जोर्डन पिकफोर्डले बचाए ।

३८औं मिनेटमा हामेस रोड्रिग्वेजको फ्रिकिकमा एब्डुलाय डोउकोउरेले मिलाइदिएको पासमा मासन होल्गेट चुक्दा एभर्टन अग्रता लिनबाट चुक्यो । ४५औं मिनेटमा स्टुआर्ट डालासको क्रसमा ज्याक ह्यारिसनको हेडर रिवाउन्ड आउदा बामफोर्डको प्रहार बाहिरियो ।

४७औं मिनेटमा डोमिनिक काल्भर्ट लेविनले काउन्टर अट्याकमा अवसर पाएपनि सदुपयोग गर्न सकेनन् । ७९औं मिनेटमा राफिन्हाले ज्याक ह्यारिसनको पासमा गोल गर्दै लिड्सलाई अग्रता दिलाए । इन्ज्युरी समयको थप गरिएको तेस्रो मिनेटमा रोड्रिगोको प्रहारलाई पिकफोर्डले उत्कृष्ट बचाउ गरेपनि एभर्टनले हार टार्न सकेन ।

प्रिमियर लिगमा लिड्सको यो चौथो जित हो । लिड्स १० खेलबाट १४ अंक जोडेर ११औं स्थानमा उक्लिएको छ । पराजित एभर्टन १६ अंकसहित छैटौ स्थानमा रहेको छ ।