एजेन्सी – युरोपा लिगको अघिल्लो चरणमा स्थान बनाइसकेको लन्डन क्लब आर्सनलले समूह चरणमा शतप्रतिशत जित हात पारेको छ ।

बिहीबार राति अष्ट्रियन क्लब रापिड वेनमाथि ४–१ को सानदार जित निकाल्दै आर्सननले शतप्रतिशत जितलाई निरन्तरता दिएका हो । आर्सनलको जितमा एलेसान्द्रे लाकाजेट, पाब्लो मारी, इडवार्ड एनकेइट र इमिल स्मिथ रोइले गोल गरे । रापिडका कोया किटागावाले सान्त्वना गोल फर्काए ।

इमिरेट्स स्टेडियममा करिव दुई हजार समर्थकलाई प्रवेश दिइएको खेलमा घरेलु टोलीले खेलको शुरुवातदेखि नै रापिडलाई दवावमा राख्न सफल भएको थियो । १०औं मिनेटमा एलेसान्द्र लाकाजेटले गोल गर्दै आर्सनललाई अग्रता दिलाए ।

१८औं मिनेटमा पाब्लो मारीले रेइस नेल्सनको पासमा गोल गर्दै आर्सनलको अग्रता दोब्बर पारे । ४४औं मिनेटमा एनकेइटले गोल गरेपछि आर्सनलले पहिलो हाफमै ३–० को आरामदायी अग्रता लिएको थियो ।

४७औं मिनेटमा कोया किटागावाले गोल गर्दै खेललाई ३–१ को अवस्थामा ल्याए । तर ६६औं मिनेटमा इमिल स्मिथ रोइले गोल गर्दै आर्सनलाई ४–१ को सानदार जित दिलाए ।

समूह ‘बी’ मा अपराजित रहेको आर्सनलको ५ खेलबाट १५ अंक पुगेको छ । मोल्देको समान खेलबाट ९ अंक छ । रापिडको ६ तथा डुन्डल्कले अंकका खाता खोल्न सकेको छैन ।

यही समूहको अर्काे खेलमा मोल्देले डुन्डल्कलाई ३–१ ले पराजित गर्दै अन्तिम ३२ मा स्थान पक्का गरेको छ । मोल्देको जितमा माग्नस इकरिम, ओही एन्थोनी ओमोइजुवाफो र मार्टिन इलिङसेनले गोल गरे । डुन्डल्कका जोर्डन फ्लोरेसले एक गोल फर्काए ।