एजेन्सी – बार्सिलोनाका लागि जस्तै कप्तान लिओनल मेस्सीका लागि पनि यो सिजनको सुरुवात सन्तोषजनक हुन सकेको छैन । असाधारण प्रतिभाका धनी मेस्सीले आफैले पनि बार्सिलोनाका लागि यसअघिका वर्षहरुमा जस्तो प्रदर्शन गर्नबाट चुकिरहेका छन् ।

सम्भवत उनी अहिले आफूले चाहेको टोलीबाट खेलिरहेका छैनन् । सिजनको सुरुवातमै उनी क्लबबाट अलग हुन चाहन्थे । तर त्यो सम्भव हुन सकेन । अर्को मैदान भित्र र बाहिर दुवैतिरका उत्तिकै नजिकका मित्र लुइस सुआरेजले बार्सिलोना छाड्दा मेस्सी खुसी छैनन् ।

रोनाल्ड कोम्यानको नेतृत्वमा मेस्सी पनि संघर्ष गरिरहेका छन् । हुन सक्छ कोम्यान नयाँ पुस्ताको तयारीमा जुट्दा त्यसको असर टोलमिा परेको हुन सक्दछ । शनिबार ला लिगामा काडिजविरुद्धको खेलमा पनि त्यस्तै देखिन्थ्यो।

मेस्सी खेलमा पुरै केन्द्रीत त थिए, तर उनी लक्ष्यबाट बारम्बार चुकिरहेका थिए । अर्जेन्टिनी सुपरस्टारले २९ पटक बल नियन्त्रण गुमाएका थिए । यो सिजनमा मेस्सीले गुमाएको नियन्त्रण त्यो सबैभन्दा बढी हो ।

गोलको संख्या हेर्ने हो भने पनि मेस्सीको सन्तोषजनक छैन । ३३ वर्षे सुपर स्टारले १६ अवे खेलमा मात्र २ गोल गरेका छन् । यो सिजनमा उनले १३ खेलमा मात्र ७ गोल गरेका छन् । त्यसमा पनि ५ गोल पेनाल्टीमा गरेका छन् । २ गोल नियमित समयमा गरेका छन् । तर उनले गोल गर्नुअघि नै खेलमा बार्सिलोनाको जित लगभग निश्चित थिए ।

अफ फिल्ड समस्या

समय थियो बार्सिलोनामा मेस्सीको विकल्पको बारेमा चर्चा पनि हुन्नथ्यो । अहिले मेस्सीको प्रदर्शनको चर्चा मात्र होइन आलोचना पनि हुन थालेको छ । व्यवस्थापन बोर्डका अध्यक्ष कार्लेस टुस्केट्सले मेस्सी विना क्लब राम्रो हुन सक्ने बताएका थिए ।

त्यसबाट पनि बुझ्न सकिन्छ मेस्सी किन क्लब छाड्न चाहन्थे । अहिले क्लबको कमजोर प्रदर्शनको दोष धेरै त मेस्सीमाथि नै थोपरिन थालेको देखिन्छ ।