एजेन्सी – यूईएफए च्याम्पियन्स लिगको समूह चरणको अन्तिम खेलमा आज राति क्याटलान क्लब बार्सिलोनाले घरेलु मैदानमा इटालियन च्याम्पियन युभेन्ट्सको आतिथ्यता गर्दैछ । खेल नोउक्याम्पमा नेपाली समयअनुसार राति १ः४५ बजे हुनेछ ।

यो खेललाई आधुनिक फुटबलका दुई हस्ती लियोनेल मेस्सी र क्रिस्टियानो रोनाल्डोबीचको प्रतिस्पर्धाको रुपमा हेरिएको छ । अघिल्लो महिना नै रोनाल्डो र मेस्सीबीच प्रतिस्पर्धा हुने भनिएपनि कोरोना संक्रमणका कारण रोनाल्डो टोली बाहिर रहँदा बार्सिलोनाले २–० को जित निकालेको थियो । यसको अर्थ मेस्सी र रोनाल्डोबीच २ वर्षपछि प्रतिस्पर्धा हुँदैछ ।

घरेलु मैदानमा बार्सिलोना युभेन्ट्सलाई पराजित गर्दै समूह ‘जी’ मा अपराजित रहने लक्ष्यमा हुनेछ । बार्सिलोनाको यो लक्ष्यमा कप्तान लियोनेल मेस्सीसँगै फिलिपे कौटिन्हो, एन्टोइन ग्रिजमन, मार्टिन ब्रेथवेट, मिरोलेम प्यानिच, फ्रान्की डि जोङ, जोर्डी अल्वा, क्लेमेन्ट लेङ्लेट, सर्जिनो डेस्ट, रोनाल्ड एराउजो र गोलरक्षक मार्क आन्दर टेर स्टेगन टोलीमा हुनेछन् ।

यता, समूहमा बार्सिलोनासँगै मात्रै हार बेहोरेको युभेन्ट्स पनि अघिल्लो महिना घरेलु मैदानमा बेहोरेको हारको बदला लिने लक्ष्यमा मैदान उत्रनेछ । बार्सिलोनामाथि ३–० को जित निकालेमा युभेन्ट्स हेड टु हेडमा अघि रहँदै शीर्षस्थानमा रहँदै नकआउट चरणमा प्रवेश गर्नेछ ।

युभेन्ट्ससँग रोनाल्डोसँगै अल्भारो मोराटा, आरोन राम्सी, आर्थर, फेडरिको चियसा, एलेक्स सान्द्रो, वेस्टन म्याकिन्नी, डानिलो, म्याथ्थिज डि लेग्ट, लियोनादा्रे बोनुची र गोलरक्षक वोजचिएक सेचेज्नीको साथ रहेको छ ।

यि दुई टोली हालसम्म ७ पटक प्रतिस्पर्धा गर्दा बार्सिलोना चार खेलमा विजयी भएको छ । एक खेल युभेन्ट्सले आफ्नो पक्षमा पार्दा २ खेल बराबरीमा सकिएको छ । पछिल्लो पाँच खेलमा बार्सिलोना युभेन्ट्ससँग अपराजित छ । बार्सिलोना पनि अपराजित यात्रालाई निरन्तरता दिने दाउमा रहँदा युभेन्ट्स बार्सिलोनासँगमाथि २०१७ पछि जित निकाल्ने दाउमा हुनेछ ।

यही समूहको अर्काे खेलमा युक्रेनी क्लब डेनामो किएभ र हंगेरियन क्लब फेरेन्कभारोसबीच राति १ः४५ बजे नै प्रतिस्पर्धा हुनेछ । समूहकम तेस्रो स्थानमा रहने टोलीले युरोपा लिगको प्ले अफ खेल्न पाउने भएका कारण दुवै टोलीको जितको लक्ष्यमा हुनेछ । दुवै टोलीको समान १ अंक छ ।