एजेन्सी – युईएफए च्याम्पियन्स लिगको समूह चरणको अन्तिम खेलमा आज राति अष्ट्रियन क्लब साल्जबर्गले घरेलु मैदानमा स्पेनिस क्लब एट्लेटिको म्याड्रिडको सामना गर्दैछ ।

खेल रेडबुल एरिना वालसमा नेपाली समयअनुसार राति १ः४५ बजे हुनेछ । दुवै टोली खेल आफ्नो पक्षमा पार्दै समूह ‘ए’ बाट नकआउट चरणमा पुग्ने लक्ष्यमा हुनेछ । साल्जबर्गलाई नकआउट चरण पुग्न एट्लेटिकोविरुद्ध निश्चित जितको खाँचो छ ।

बराबरी या हारले साल्जबर्गको यो सिजनको च्याम्पियन्स लिग यात्रा समूह चरणमै टुंगिनेछ । त्यसैले साल्जबर्ग एट्लेटिको विरुद्ध निश्चित जितकै लागि खेल्नेछ । टोलीसँग सिकोउ कोइटा, मर्गिम बेरिसा, ज्लाटको जुनुजभिच, इनक मेउपु, म्याक्सिमिलियन वुवेर, एन्ड्रियस उल्मेर र गोलरक्षक सिक्यान स्टान्कोभिचको साथ रहेको छ ।

यता, बराबरीले पनि अघिल्लो चरणको यात्रा तय गर्ने एट्लेटिको म्याड्रिड साल्जबर्गविरुद्ध अंक नगुमाउने लक्ष्यमा हुनेछ । टोलीसँग लुइस सुआरेज, जोआओ फेलिक्स, भिटोलो, कोके, मार्काेस लोरेन्टे, किरिएन ट्रिपिएर र जान ओब्लाकको साथ रहेको छ ।

यही समूहको अर्काे खेलमा जर्मन क्लब बायर्न म्युनिखले रसियन क्लब लोकोमोटिभ मस्कोबीच राति १ः४५ बजे प्रतिस्पर्धा हुनेछ । बायर्न समूह विजेताको रुपमा नकआउट चरणमा पुगिसकेको छ । लोकोमोटिभलाई युरोपा लिगको प्ले अफ खेल्ने सम्भावना रहेको छ ।

लोकोमोटिभले बायर्नविरुद्ध जित हात पारे र साल्जवर्ग एट्लेटिकोसँग पराजित भएको अवस्थामा लोकोमोटिभले युरोपा लिगको प्ले अफमा स्थान पक्का गर्नेछ ।