एजेन्सी – युईएफए च्याम्पियन्स लिगको समूह चरणको अन्तिम खेलमा आज राति इंग्लिस क्लब म्यानचेस्टर सिटी र फ्रान्सेली क्लब मार्सेबीच प्रतिस्पर्धा हुँदैछ ।

खेल म्यानचेस्टर सिटीको घरेलु मैदान इतिहाद स्टेडियममा राति १ः४५ बजे हुनेछ । समूह ‘सी’ विजेताको रुपमा नकआउट चरणमा स्थान बनाइसकेको सिटी समूहमा अपराजित रहने योजनासहित मैदान उत्रनेछ । सिटीले मार्सेविरुद्ध दोस्रा रोजाईको टोलीलाई मौका दिन सक्नेछ ।

टोलीसँग फेरान टोरेस, फिल फोडेन, बर्नाडो सिल्भा, रोड्री, फर्नाडिन्हो, इल्केए गुन्डोगान, इरिक गार्सिया, काइल वाल्कर र गोलरक्षक इडर्सन मोराएसको साथ रहेको छ । रहिम स्टर्लिङ, गाब्रियल जेसस, केभिन डि ब्रुयन र रियाद महारेजलाई विश्राम दिन सक्नेछ ।

यता, युरोपा लिग खेल्ने सम्भावना रहेको मार्से पनि सिटीलाई हराउने लक्ष्यमा मैदान उत्रनेछ । मार्से र ओलम्पियाकोसबीच युरोपा लिग स्थानको लागि प्रतिस्पर्धा छ । दुवै टोलीको समान ३ अंक छ ।

ग्रीसको ओलम्पियाकोसले पोर्चुगिज एफसी पोर्टाेसँग खेल्दैछ । सिटीविरुद्ध जित निकालेको अवस्थामा र अर्काे खेलमा ओलम्पियाकोस पराजित भए मार्से युरोपा लिगको प्ले अफमा प्रवेश गर्नेछ । मार्सेसँग डिमिट्रि पाएट, डारियो बेनेडेट्टो, फ्लोरियल थोउभिन, बोउबाकार कामरा, जोर्डन एमाभी, हिरोकी साकाई र गोलरक्षक स्टिभ मान्डान्डाको साथ रहेको छ ।