एजेन्सी – इटालियन क्लब एटलान्टा युइएफए च्याम्पियन्स लिगको नकआउट चरणमा पुग्न सफल भएको छ ।

समूह चरणको अन्तिम खेलमा १० खेलाडीमा समेटिएको डच क्लब आयाक्समाथि १–० को जित निकाल्दै एटलान्टाले समूह ‘डी’ बाट उपविजेताको रुपमा अन्तिम १६ मा स्थान बनाउन सफल भएको हो ।

यो समूहबाट इंग्लिस क्लब लिभरपुल समूह विजेता बन्दै अघिल्लो चरणको यात्रा तय गर्दा एटलान्टासँग पराजित भएको आयाक्स युरोपा लिगमा झरेको छ ।

योहान क्रुएफ एरिना आम्सटर्डममा बुधबार राति भएको खेलको १९औं मिनेटमा डि रुनको प्रहार पोस्ट नजिकैबाट बाहिरिदा एटलान्टा अग्रता लिनबाट चुक्यो । पहिलो हाफको इन्ज्युरी समयमा एन्टोनीको पासमा ब्रोबवेले डि बक्सभित्रबाट गरेको प्रहार गोलरक्षक गोलिनीको हातमा पुग्दा आयाक्सले अग्रता लिन सकेन ।

६६औं मिनेटमा एन्ड्रे ओनानाको गल्तीको फाइदा एटलान्टाले लिन सकेन । कर्नरबाट आएको बललाई ओनानाले पञ्च गर्न प्रयास गरेपनि सफल हुन नसक्दा एटलान्टाले अर्काे कर्नर पाएको थियो ।

६८औं मिनेटमा बेराट डिजिमसिटीको गल्तीमा इकेलेनकेम्पले क्लास जान हन्टेलरलाई पास दिनुअघि फ्रेउलेरले फल गरेको भन्दै आयाक्सले पेनाल्टीको अपिल गरेपनि रेफ्रीले त्यसलाई सुनुवाई गरेन । ७४औं मिनेटमा हन्टेलरको ब्याकहिल पासमा इकेलेनकेम्पको प्रहारलाई गोलिनिले बचाउदै आयाक्सको अग्रता टारे ।

७९औं मिनेटमा घरेलु टोली आयाक्स १० खेलाडीमा समेटियो । रायन ग्राभेनवर्च दोहोरो पहेलो कार्ड खादै मैदानबाट बाहिरिए । त्यसको फाइदा उठाउदै एटलान्टाले ८५औं मिनेटमा गोल गर्दै अग्रता लिन सफल भयो । लुइस मुरिएलले रेमो फ्रेउलेरको पासमा गोल गरेका थिए । बल पोजेसनमा घरेलु टोलीले पकड बनाएपनि गोल गर्न नसक्दा पराजित हुन पुग्यो ।

यो समूहको अर्काे खेलमा इंग्लिस क्लब लिभरपुल डेनिस क्लब मिट्जेल्यान्डसँग १–१ गोलको बराबरीमा रोकियो । लिभरपुलका मोहम्मद सलाहले खेलको पहिलो मिनेटमा गोल गर्दै अग्रता दिलाएपनि ६२औं मिनेटमा एलेक्सान्डर स्कल्जले पेनाल्टीमा गोल गर्दै खेललाई १–१ गोलको बराबरीमा ल्याएका थिए ।

यो समूहमा लिभरपुलले १३ अंक जोड्यो । एटलान्टाले ११ तथा आयाक्सले ७ तथा मिट्जेल्यान्डले २ अंक जोड्यो ।