एजेन्सी – इंग्लिस क्लब आर्सनलले युरोपा लिगको समूह चरणको खेलमा शतप्रतिशत जित निकालेको छ । बिहीबार राति आयरल्यान्डको डुन्डाल्कलाई ४–२ ले पराजित गर्दै आर्सनलले समूह चरणमा शतप्रतिशत जित निकालेका हो ।

समूह ‘बी’ मा आर्सनलले मोल्दे, रापिड वेन र डुन्डाल्कलाई दुवै लेगमा हराउन सफल भयो । एभिभा स्टेडियम डब्लिनमा बिहीबार राति भएको खेलमा आर्सनललाई जिताउन इडुआर्ड एनकेइट, मोहमेद इलाने, जोसेप विललक र फोलारिन बालोगनले गोल गर्दा घरेलु टोलीका जोर्डन फ्लोरेस र सिन होआरेले गोल गरे ।

पाहुना टोली आर्सनलले खेलको १८ मिनेटभित्र नै २–० को अग्रता कायम गरेको थियो । १२औं मिनेटमा इडुआर्डले तथा १८औं मिनेटमा मोहमद इलानेले गोल गरेका थिए । २२औं मिनेटमा जोर्डन फ्लोरेसले गोल गर्दै घरेलु टोलीलाई खेलमा फर्कने संकेत दिएका थिए । ६७औं मिनेटमा जोसेप विललकले गोल गर्दै आर्सनललाई जिततर्फ अघि बढाए ।

८०औं मिनेटमा फोलारिनले गोल गरेपछि आर्सनले खेलमा ४–१ को अग्रता बनायो । खेल सकिन ५ मिनेट बाँकी रहँदा सिन होआरेले गोल गरेपनि घरेलु टोलीले हार टार्न सकेन । यो समूहको अर्काे खेलमा रापिड वेन र मोल्देले २–२ गोलको बराबरी खेल्दै अंक बाँडे ।

यो नतिजासँगै आर्सनल शतप्रतिशत जित निकाल्दै १८ अंक जोडेर शीर्षस्थानमा रह्यो । मोल्दे १० अंकसहित दोस्रो स्थानमा रहँदै नकआउट चरणमा पुग्न सफल हुदा रापिड वेन ७ अंकसहित तेस्रो स्थानमा रहँदा अंकविहीन हुदै डुन्डाल्क पुछारमा रह्यो ।