एजेन्सी – विश्वकै उत्कृष्ट खेलाडी बन्ने लक्ष्यका साथ नेयमार बार्सिलोना छाडेर तीन वर्षअघि पेरिस सेन्ट जर्मेन (पिएसजी) पुगेका थिए । तर, मैदान भित्र र बाहिरका अनेक विषयले उनको योजनामा तगारो लागिरह्यो ।

पछिल्लो समय भने उनी त्यो पथमा अघि बढेको संकेतहरु देखिन थालेका छन् । २८ वर्षका नेयमार अब विश्वको उत्कृष्ट खेलाडीको सुचीमा पर्ने क्रममा अघि बढेका छन् । युभेन्ट्सका क्रिस्टियानो रोनाल्डो ३५ वर्ष र बार्सिलोनाका लिओनेल मेस्सी ३३ वर्ष भइसक्दा पनि आफ्नो स्वभाविक लयमा खेल्ने कोसिस गरिरहेका छन् ।

‘म पेरिस आएदेखि उत्कृष्ट लयमा छु,’ पहिलो पटक पिएसजीलाई च्याम्पियन्स लिगको फाइनलमा पुर्याएपछि नेयमारले अगष्टमा भनेका थिए । त्यति बेला टोलीलाई फाइनल सम्मको यात्रा तय गराउने क्रममा नेयमारले अन्तिम १६ मा बोरुसिया डर्टमुन्डविरुद्ध २ गोल गरेका थिए । त्यस्तै अट्लान्टाविरुद्धको क्वाटरफाइनलमा र आरबी लाइप्जिगविरुद्ध एक-एक असिस्ट गरेका थिए ।

यो सिजन उनले लाइप्जिगविरुद्ध एक, म्यानचेस्टर युनाइटेडविरुद्ध २ र इस्तानबुल बासाकसेइरविरुद्ध ह्याट्रिक प्रहार गरेका छन् । च्याम्पियन्स लिगको समूह चरणमा पिएसजी समूह एचको विजेताका रुपमा अन्तिम १६ मा पुगिसकेको छ ।

नेयमारले आफ्नो खेल जीवनमा पहिलो पटक लगातार दुई खेलमा दुई वा त्यो भन्दा बढी गोल गरेका छन् । त्यो पनि टोलीलाई अति आवश्यक समयमा उनले गोल निकालेका छन् । टर्कीस टोलीविरुद्ध समूह चरणको अन्तिम खेलमा पिएसजीले ५ गोल गर्दा नेयमार सबै गोलमा सामेल भएका थिए ।

खेलमा उनीमाथि सबैभन्दा बढी ६ फाउल भएको थियो । उनले ८ वटा सट प्रहार गर्दा ६ वटा गोलरक्षकले बचाएका थिए । उनले १३ पटक ड्रिबल गर्दा सबैभन्दा बढी ५ पटक सफल भए ।

बार्सिलोनामा हुँदा सन् २०१३ मा उनले सेल्टिकविरुद्ध र २०१८ मा रेड स्टारविरुद्ध ह्याट्रिक गरेका थिए । आधुनिक च्याम्पियन्स लिगमा रोनाल्डो र मेस्सीले मात्र नेयमारभन्दा बढी ह्याट्रिक गरेका छन् । दुवैले समान ८ पटक ह्याट्रिक गरेका छन् ।

बुधबारको खेलपछि ब्राजिलियन स्टारले च्याम्प्यिन्स लिगमा सर्वाधिक गोल गर्ने सुचीको १६ औं स्थानमा पुग्ने क्रममा सर्जियो अगुएरो र रिभाल्डोलाई पछि पारेका छन् । नेयमारले ६५ च्याम्पियन्स् लिग खेलमा ४१ गोल गर्नुका साथै २४ असिस्ट गरेका छन् । यो सिजन नेयमारबाहेक ३ खेलाडी मार्कस रासफोर्ड, इर्लिङ हालान्ड र एल्भारो मोराटोले मात्र ५ भन्दा बढी गोल गरेका छन् । सबैले ६-६ गोल गरेका छन् ।

पिएसजीमा सबै खाले गरि ९६ खेलमा नेयमारले ७८ गोल गर्नुका साथै ४० असिस्ट गरिसकेका छन् । टोलीका लागि च्याम्पियन्स लिगमा उनी सर्वाधिक गोल गर्ने सुचीको दोस्रो स्थानमा छन् । इडिन्सन काभानीको नाममा ३० र नेयमारको नाममा २० गोल छ ।