एजेन्सी – स्पेनिस ला लिगामा आज राति एक खेलमा मात्र प्रतिस्पर्धा हुदा रियल म्याड्रिडले घरेलु मैदानमा एथलेटिक बिल्बाओसँग प्रतिस्पर्धा गर्दैछ । खेल राति २ः४५ बजे रियलको घरेलु मैदान अल्फ्रेडो डि स्टेफानोमा हुनेछ ।

घरेलु मैदानमा बिल्बाओलाई हराउदै रियल शीर्षस्थानको रियल सोसिडाड र एथलेटिको म्याड्रिडसँगको अंक बराबरी गर्ने लक्ष्यमा हुनेछ । रियलको १२ खेलबाट २३ अंक रहेको छ । १३ खेलबाट रियल सोसिडाडको २६ तथा ११ खेलबाट एट्लेटिको म्याड्रिडको २६ अंक छ ।

टोलीसँग करिम बेन्जेमा, भिनिसियस जुनियर, रोड्रिगो गोएस, लुकास भास्क्वेज, मार्काे एसेन्सियो, टोनी क्रुस, क्यासमिरो, लुका मोड्रिच, कप्तान सर्जियो रामोस, राफयल भरान, फर्लान्ड मेन्डी, ड्यानी कार्भाहल र गोलरक्षक थिवाउट कोर्टुवाको साथ छ । फेडरिको भाल्भेर्डे, इडर मिलिटाओ, मार्सेलो, इस्को, अल्भारो ओर्डिजोला र नाचो फर्नान्डेस पनि टोलीसँग रहेको छ ।

यता, बिल्बाओ पनि रियाललाई स्तब्ध पार्दै नवौं स्थानमा उक्लने दाउमा रहनेछ । बिल्बाओको १२ खेलबाट १४ अंक रहेको छ । बिल्बाओसँग राहुल गार्सिया, इनाकी विलियम्स, इकर मुनिएन, ड्यानी गार्सिया, युनाई लोपेज, युनाई नुनेज, एन्डर कापा र गोलरक्षक युनाई सिमोन रहेको छ ।

रियल बिल्बाओसँग पछिल्लो १० खेलमा अपराजित छ । जसमा ६ जित र ४ बराबरीको नतिजा छ । रियल ७ मार्च २०१५ मा बिल्वाओसँग १–० ले पराजित भएयता अपराजित छ । रियल सोही अपराजित यात्रालाई निरन्तरता दिने दाउमा रहँदा बिल्बाओ रियलसँगको हारको श्रृंखला तोड्ने लक्ष्यमा हुनेछ ।