एजेन्सी– इर्लिङ हालान्डले आफू बोरुसिया डर्टमुण्डमै खुसी रहेको बताएका छन् । नयाँ क्लबमा जान सक्ने चर्चाका बीच नर्वेजियन युवा फरवार्डको यस्तो भनाई सार्वजनिक भएको छ ।

पछिल्लो पटक युभेन्ट्सले हालान्डलाई भित्राउनका लागि प्रयास गरिरहेको इटालियन सञ्चारमाध्यमहरुले उल्लेख गरेका थिए । ‘चर्चा विभिन्न भइरहेका छन् । तर मैले आफूले कहिल्यै भनेको छैन,’ विभिन्न चर्चाकाबीच सोधिएको प्रश्नको जवाफमा हालान्डले भने,’ म वर्ष दिन देखि बारुसिया डर्टमण्डमा छु । म यहाँ ठीक छु , खुसी छु ।’

हालान्डका एजेन्ट मिनो रायोला भएका कारणले मात्र पनि होइन, तर ठूलो रकममा उनी अर्को क्लब जान सक्ने भन्ने विषयमा पटक पटक चर्चा हुने गरेका छन् । ‘मिनोले मलाई निकै सहयोग गरेका छन्,’ उनले भने, ‘उनी विश्वकै उत्कृष्ट एजेन्ट हुन् । म आफ्नो खेल जीवनमा उनीसँग अघि बढ्न चाहन्छु ।’

टुटो स्पोर्टस्ले यू २१ का खेलाडीलाई दिने गोल्डेन ब्वाइ अवार्ड ग्रहण गरेपछि हालान्डले भने, ‘यो ठूलो अवार्ड हो । मलाई यसमा गर्व छ । यसले अझै आउने दिनमा राम्रो गर्न मनोबल उच्च बनाउनेछ । ‘

अर्को अवार्ड भने फिफा वेस्टको अन्तिम ३ मा रहेका बायर्न म्युखिनका रोबेर्टो लेवान्डोस्कीले जिते । ‘उनी विश्वका उत्कृष्ट खेलाडी मध्ये एक हुन्,’ हालान्डले लेवान्डोस्कीका बारेमा भने,’ म उनलाई हेरिरहेको हुन्छ । म पनि उनले जस्तै उपाधि जित्न र गोल गर्न चाहन्छु ।’