एजेन्सी – पेरिस सेन्ट जर्मेन (पिएसजी) का युवा स्टार केलियन एमबाप्पे बुधबारको लिग वानमा नयाँ रुपमा देखिदा धेरैको ध्यान तान्न सफल भएका थिए । घरेलु फुटबलमा कमजोर फर्ममा गुज्रिरहेका एमबाप्पे केहि दबाबमा पक्कै छन् ।

फुटबल बाहेकका कारणले पनि यसपटक एमबाप्पेले चर्चा बटुले । उनले आफ्नो कपाललाई निलो रंगले रंगाएका छन् । निलो उनको राष्ट्रिय टोली फ्रान्स र पिएसजी दुवैले प्रयोग गर्ने रंग हो । पछिल्लो समय एमबाप्पेले मैदानबाहिर व्यक्तिगत पक्षमा पनि चर्चा पाएपछि यसको कारण नेयमारको संगतसँग जोड्न थालिएको छ ।

चोटका कारण नेयमारको अनुपस्थितिमा लोरिएन्टविरुद्धको खेलमा उनले मोइस किनसँग टोलीको अग्रपक्तिको मोर्चा सम्हालेका थिए । जहाँ टोलीलाई जित दिलाउन उनी सफल रहे । लोरिएन्टलाई पिएसजीले २–० ले हराउँदा एमबाप्पे एक गोल गर्न सफल भएका थिए । अर्को गोल किनले गरे ।

दुवै गोल दोस्रो हाफमा सम्भव भएको थियो । ४९ औं मिनेटमा पेनाल्टी बक्समा एमबाप्पेलाई फाउल हनेपछि एन्ड्रिउ ग्राभिलियनले रातो कार्डको सामना गर्ने परेको थियो । प्राप्त पेनाल्टीलाई एमबाप्पेले गोलमा परिणत गरेका थिए ।

६० औं मिनेटमा किनले गोल गर्दै टोलीको अग्रतालाई दोब्बर पारे । राफिन्हाको पासमा किनले गोल गरेका थिए । जितपछि पिएसजी १५ खेलमा ३१ अंकका साथ दोस्रो स्थानमा यथावत छ । शीर्षस्थानको लिलको ३२ अंक छ । ११ अंक मात्र रहेको लोरिएन्ट १८ औं स्थानमा छ ।