एजेन्सी – उरुग्वेली फरवार्ड लुइस सुआरेजको दुई गोल सहयोगमा शीर्षस्थानमा रहेको एट्लेटिको म्याड्रिडले स्पेनिस ला लिगामा इल्चेलाई ३–१ ले पराजित गरेको छ ।

घरेलु मैदान वान्डा मेट्रोपोलिटानोमा शनिबार राति भएको खेलमा सुआरेजले पहिलो र दोस्रो हाफमा समान एक–एक गोल गर्दा डिएगो कोस्टाले एक गोल थपे । इल्चेका लुकास बोएले सात्वना गोल फर्काए ।

घरेलु मैदानमा एट्लेटिकोको बल पोसेसनमा पकड बनाएपनि गोलको लागि खेलको ४१औं मिनेट नै कुर्नुपरेको थियो । काइरान ट्रिपिएरको पासमा सुआरेजले गोल गर्दै घरेलु टोलीलाई पहिलो हाफमा १–० को अग्रता दिलाएका थिए ।

५८औं मिनेटमा सुआरेजले यान्निक कारास्कोको पासमा व्यक्तिगत दोस्रो गोल गर्दै एट्लेटिको म्याड्रिडको अग्रता दोब्बर पारे । ६४औं मिनेटमा लुकास बोएले गोल गर्दै खेललाई २–१ को अवस्थामा ल्याए । ८०औं मिनेटमा सब्सिच्युट डिएगो कोस्टाले पेनाल्टीमार्फत गोल गर्दै खेललाई ३–१ को अवस्थामा ल्याए ।

मार्काेनले पेनाल्टीबक्समा कोस्टामाथि नै फल गरेपछि प्राप्त पेनाल्टीमा कोस्टा आफैंले गोल गरेका थिए । उनी ७३औं मिनेटमा जोआओ फेलिक्सको स्थानमा मैदान छिरेका थिए । त्यसपछि दुवै टोलीबाट गोल निस्कन नसक्दा एट्लेटिको ३–१ ले विजयी हुन सफल भयो ।

यो जितसँगै शीर्षस्थानमा रहेको एट्लेटिको म्याड्रिडले शीर्षस्थानमा ३ अंकको अग्रता बनाएको छ । दोस्रो स्थानको रियल सोसिडाडको २६ अंकले एट्लेटिकोले १२ तथा रियल सोसिडाडले १४ खेल खेलेको छ । तेस्रो स्थानको रियाल म्याड्रिडको २६ अंक छ । इल्चे १४ अंकसहित १५औं स्थानमा छ ।