एजेन्सी– बार्सिलोनाका कप्तान लिओनल मेस्सीले खेल जीवनमा बनाएका कतिपय कीर्तिमान भंग हुन असम्भव जस्तै देखिएका छन् । पछिल्लो पटक उनले एउटै क्लबका लागि सर्वाधिक गोल गर्ने ब्राजिलियन महान खेलाडी पेलेको कीर्तिमानलाई भंग गरेका छन् ।

पेलेले ६ सय ४३ गोल गरेका छन् । मेस्सीले बार्सिलोनाका लागि ६ सय ४४ गोल गरेका छन् । पेलेको कीर्तिमान भंग गरेपनि मेस्सीले सामाजिक सञ्जालमार्फत कीर्तिमानका लागि सहयोग गर्नेलाई धन्यवाद दिएका छन् ।

‘जति बेला मैले खेल्न सुरु गरेको थिए, मैलै कीर्तिमान भंग गर्ने विषयमा सोचेको थिएन । त्यसमध्ये मैले आज एउटा कीर्तिमान बनाएको छु । पेलेले बनाएको कीर्तिमान भंग गरेको छु । म यति बेला मलाई वर्षौंदेखि सहयोग गर्ने सहकर्मी, मेरो परिवार, मेरा साथीहरु र हरेक दिन मलाई सहयोग गर्नेलाई धन्यवाद , ‘मेस्सीले लेखेका छन् ।

अर्जेन्टिनी सुपर स्टारले अन्य थुप्रै कीर्तिमान आफ्नो नाममा लेखाएका छन् । मंगलबार मात्रै उनले प्रतिष्ठित पिचिची ट्रफी कीर्तिमानी सातौं पटक जितेका छन् । यसमा पनि उनले महान टेल्मो जाराको कीर्तिमान तोडेका छन् । ‘सातौं पटक यो अवार्ड जित्दै जाराको कीर्तिमान तोड्नु आफैमा गर्वको विषय हो । यसको ठूलो अर्थ छ, ‘मेस्सीले भनेका छन् ।

३३ वर्षे मेस्सी बार्सिलोनाका सर्वाधिक गोल गर्ने खेलाडी हुन् । उनले टोलीका लागि सर्वाधिक ३४ उपाधि जितेका छन् । आन्द्रे इनियस्टा भन्दा २ उपाधि बढी जितेका छन् । त्यस्तै ला लिगामा मात्र उनले ३५ पटक ह्याट्रिक गरेका छन् ।

त्यस्तै उनले एउटै सिजन सन् २०११ /१२ मा ५० गोल गरेका थिए । अहिले पनि उच्च फर्ममा रहेका मेस्सीले ६ पटक २००९, २०१०,२०११,२०१२,२०१५ र २०१९ मा बालोन डी ओर उपाधि जितेका छन् ।