एजेन्सी – फ्रेन्च फरवार्ड करिम बेन्जेमा र ब्राजिली मिडफिल्डर क्यासमिरोको गोलमा रियल म्याड्रिडले स्पेनिस ला लिगामा ग्रानडालाई २–० ले पराजित गरेको छ ।

घरेलु मैदान अल्फ्रेडो डि स्टेफानोमा बुधबार राति भएको खेलमा रियलको दुवै गोल दोस्रो हाफमा सम्भव भएको थियो । ग्रानडामाथि खेलको सुरुवातदेखि नै रियलले बल पोसेसनमा पकड बनाउदै लगातार आक्रमण बुनेपनि गोलको लागि दोस्रो हाफ नै कुर्नुपरेको थियो ।

खेलको पहिलो मिनेटमा नै डिफेन्डर राफायल भरानको गल्तीमा रोबर्टाे सोल्डाडोको प्रहार पोस्ट नजिकैबाट बाहिरिदा ग्रानडाले अग्रता लिने मौका गुमाएको थियो । १५औं मिनेटमा टोनी क्रुसको फ्रिकिकलाई गोलरक्षक रुइ सिल्भाले मुस्किलले बचाए ।

५५औं मिनेटमा मार्काे एसेन्सियोको फ्लिक फ्रिकिकमा फेडे भाल्भर्डे र टोनी क्रुसले प्रयास गरेपनि गोलरक्षक सिल्भा बाधक बने । ५७औं मिनेटमा मार्काे एसेन्सियाको क्रसलाई क्यासमिरोले हेडरमार्फत गोल गर्दै रियललाई अग्रता दिलाए ।

इन्ज्युरी समयको थप गरिएको तेस्रो मिनेटमा बेन्जेमाले इस्कोको पासमा गोल गर्दै रियलको जित पक्का गरे । ला लिगामा रियलको यो लगातार पाँचौ जित हो ।

जितसँगै रियलले शीर्षस्थानको एट्लेटिको म्याड्रिडसँग अंक बराबरी गरेको छ । रियलको १५ खेलबाट ३२ तथा एट्लेटिकोले १३ खेल खेलेको छ । पराजित ग्रानडा २१ अंक जोडेर सातौ स्थानमा रहेको छ ।