एजेन्सी – इटालियन सिरी ‘ए’ को शीर्षस्थानमा रहेको एसी मिलान र इन्टर मिलानले बुधबार राति आ–आफ्नो खेलमा सफलता हात पारेका छन् ।

घरेलु मैदानमा एसी मिलानले लाजियोमाथि ३–२ को रोमाञ्चक जित हात पारेको हो । मिलानको जितमा एन्टी रेविच, हकान कलहानोग्लु र थियो हर्नान्डेजले गोल गरे । लाजियोका लुइस अल्बर्टाे र सिरो इम्मोबिलेले गोल गरेपनि हार टार्न सकेन ।

खेलको १०औं मिनेटमा नै एन्टी रेविचको गोलबाट मिलानले अग्रता लिएको थियो । १७औं मिनेटमा हकान कलहानोग्लुले पेनाल्टीमा गोल गर्दै मिलानको अग्रता दोब्बर पारे । २८औं मिनेटमा सिरो इम्मोविलेले पेनाल्टी चुकाएपनि रि पेनाल्टीमा रोबर्टाेले गोल गर्दै खेललाई २–१ को अवस्थामा ल्याए ।

५७औं मिनेटमा इम्मोविलेले गोल गर्दै खेललाई २–२ गोलको बराबरीमा ल्याए । तर इन्ज्युरी समयको थप गरिएको दोस्रो मिनेटमा कलहानोग्लुको पासमा थियो हर्नान्डेजले गोल गर्दै मिलानलाई रोमाञ्चक जित दिलाए ।

यो जितसँगै अपराजित रहँदै शीर्षस्थानमा रहेको मिलानको १४ खेलबाट ३४ अंक पुगेको छ । पराजित लाजियो २१ अंक जोडेर आठौं स्थानमा रहेको छ । अपराजित रहेको मिलानले १४ खेलमा १० जित र ४ बराबरीको नतिजा निकालेको छ ।

यस्तै अर्काे खेलमा इन्टर मिलानले हेलास भेरोनामाथि २–१ को जित निकालेको छ । इन्टरको जितमा लौटारो मार्टिनेज र मिलान स्क्रिनिएरले गोल गरे । घरेलु टोलीका इभान इलिसले एक गोल फर्काए ।

यो जितसँगै इन्टरले शीर्षस्थानको एसी मिलानमाथि दवाव बढाउदै १ अंकको अन्तरलाई यथावत राखेको छ । इन्टरको ३३ अंक छ । पराजित भेरोना २० अंक जोडेर नवौं स्थानमा रहेको छ ।