एजेन्सी– लुका मोड्रिचको सम्झौता नविकरण विषयमा रियल म्याड्रिड सहमत भइसकेको छ । रियलको अबको ध्यान भनेको सम्झौता सकिन लागेका अन्य खेलाडीको नविकरणका विषयमा हुनेछ ।

टोलीका महत्वपूर्ण खेलाडी मध्येका एक कप्तान सर्जियो रामोसको सम्झौता सन् २०२१ को जुनमा सकिदैछ । रामोस र क्लबबीच अझै कुनै सम्झौता भएको छैन । डिसेम्बर २० मा क्लबका सदस्यहरुबीच भेला भएको थियो । त्यसले नयाँ सिजनको बजेट तय गरेको थियो ।

रामोसले रियलमा रहन चाहेको यसअघि नै सार्वजनिक गरिसकेका छन् । त्यसका लागि दुई पक्षबीच नयाँ सम्झौता हुनु पर्नेछ । रामोस र क्लबका अध्यक्ष फ्लोरेन्टिनो पेरजबीच छलफल भएपछि नविकरणका विषयमा टुंगिने विश्वास गरिएको छ । उनीहरुबीचको सम्बन्ध हार्दिक रहेको बताइन्छ ।

रियलले भने बढी उमेरका खेलाडीसँग एक वर्षको सम्झौता गर्ने नीति रहेको छ । मोड्रिचको सम्झौता त्यसै नीतिअनुसार एक सिजन नवीकरण भएको थियो । तर, रामोस भने क्लबसँग लामो सम्झौता चाहिरहेका छन् । क्लब पनि उनीसँग सम्झौता नविकरणको पक्षमा छन् । उनको नेतृत्वमा टोलीले राम्रो गरिरहेकोले पनि उनलाई निरन्तरता दिन चाहन्छ ।

लुकास भाज्क्वेजको के हुन्छ ?

विङ्गर भाज्क्वेजको पनि रियलसँग सम्झौता सकिने क्रममा रहेको छ । रियलको एकेडेमीका उत्पादन समेत रहेका उनी टोलीको पहिलो रोजाईमा रहँदै आएका छन् । उनको प्रदर्शनबाट टोलीलाई मद्दत पुगिरहेको छ ।

त्यसले गर्दा उनीसँगको सम्झौता निवकरण गरिनुपर्ने अवाज उठेको छ । लुकासलाई २०१९ मै सम्झौता नविकरणका लागि प्रस्ताव गरिएपनि उनी त्यति बेला तयार भएका थिएनन् ।