काठमाडौं (हाम्रो खेलकुद)– कर्णाली प्रदेश फुटबल संघको अध्यक्षमा सुर्खेतका प्रमोद हमालसहित ७ सदस्यीय कार्यसमिति सोमबार निर्विरोध निर्वाचित भएको छ ।

सुर्खेतमा सोमबार भएको भेलाले प्रदेश संघको उपाध्यक्षमा जुम्लाका भरत खत्री, सुर्खेतका गणेश खत्री, जुम्लाका अजय बुढ थापालाई कोषाध्यक्ष चयन गरेको छ ।

त्यस्तै सदस्यमा सुर्खेतका कृष्ण खड्का, सुर्खेतका महेन्द्र चौधरी र जुम्लाका खगेश्वर आचार्य चुनिए ।
कर्णाली प्रदेशमा अहिले अखिल नेपाल फुटबल संघ (एन्फा) मातहत सुर्खेत र जुम्ला दुई वटा मात्र जिल्ला संघ छन् ।

कार्यसमितिले एन्फाका प्रस्तावित जिल्ला संघका ४ देखि ६ जना प्रतिनिधिलाई प्रदेश समितिमा मनोनित गर्न सक्ने एन्फा केन्द्रीय सदस्य रहेका दीर्घबहादुर केसी (कुमार) ले जानकारी दिए । एन्फाले कर्णाली प्रदेश संघ गठनका लागि केसीलाई प्रतिनिधि खटाएको थियो ।

भेलामा एन्फाका मानार्थ उपाध्यक्ष शिक्षित पराजुलीको उपस्थिति रहेको थियो । कर्णाली प्रदेशका जागरकोट, कालिकोट, मुलु र डोल्पामा प्रस्तावित जिल्ला संघ गठन हुने तयारीमा रहेको केसीले जानकारी दिए ।
देश संघियतामा गइसकेपछि एन्फाले पनि सोही अनुरुप प्रदेश संघ गठन गर्ने वैधानिक व्यवस्था गरेको थियो । सोही अनुरुप प्रदेश संघ गठन भएको हो । प्रदेश संघ स्वायत्त हुने केसीले बताए ।

‘विगतमा हामीले क्षेत्रिय संघको अभ्यास गरेको थियौं । तर त्यो संघसँग खासै अधिकार हुदैन थियो । केन्द्रको निर्देशन र योजनामा काम गर्ने परम्परा थियो,’ केसीले भने, ‘अहिले त्यो भन्दा फरक प्रदेश संघले प्रदेश र त्यसमातहत रहेका जिल्लाको फुटबल विकासका लागि योजना र कार्यक्रम सञ्चालन गर्न सक्नेछ ।’

प्रदेश संघ गठन हुनेमा कर्णाली चौथो हो । यसअघि प्रदेश १, २ र सुदूपश्चिम प्रदेश संघ गठन भइसकेको छ । एन्फाका अनुसार पुस १५ गते लुम्बिनी, पुष १८ गते गण्डकी र पुष २० गते बागमती प्रदेश फुटबल संघ गठन हुनेछ ।