एजेन्सी – रियल म्याड्रिडका प्रशिक्षक जिनेदिन जिदानले पछिल्लो समय क्लबको खेलाडीका विषयमा केहि ठूला निर्णय लिनुपर्यो । क्लबको आर्थिक पाटोसँगै आफ्नो योजनामा समेत नपरेका खेलाडीलाई अन्यत्र पठाउने दबाब उनीमा थियो ।

गत सिजनको प्रदर्शन र आफूसँगको सम्बन्धलाई मध्यनजर गर्दै जिदानले सिजनको सुरुवातमा तीन खेलाडीलाई क्लब छाड्न सुझाव दिए । ग्यारेथ बेल, हामेस रोड्रीग्वेज र ड्यानी सेबालोसलाई उनले लोनमै भएपनि अन्यत्र पठाए । तीनै खेलाडी प्रिमियर लिगको फरक फरक क्लबमा आबद्ध भए । क्लब छाडेलगत्तै जिदानको यो निर्णयलाई लिएर आलोचना गरेपनि अहिले भने उक्त निर्णय सहि सावित भएको छ ।

सेबालोस : आर्सनलको बेन्चमा नै सिमित

युवा मिडफिल्डर सेबालोस प्राविधिक रुपमा निपुण खेलाडी हुन् । प्रशिक्षक मिकेल आर्टेटाले उनलाई आफ्नो योजनामा प्रयोग पनि गरे । तर लगातार खराब नतिजा आएपछि उनले प्रदर्शनमा एकरुपता दिन सकिरहेका छैनन् । पछिल्लो खेलमा आर्सनलले चेल्सीलाई ३-१ ले पराजित गर्दा सेबालोस पूरै समय बेन्चमा नै रहे ।

पछिल्लो खेलकै योजनालाई प्रशिक्षक मिकेलले निरन्तरता दिने हो भने सेबलोसले अब आर्सनलमा पनि संघर्ष गर्नुपर्ने देखिन्छ । अर्को सिजन जिदानको टोलीमा पर्नेबारे अहिले सोच्न पनि सकिन्न । रियलले भविष्यमा उनको प्रयोग हुने देखेर नै लोनमा पठाएको थियो । तर सेबालोसको हालको प्रदर्शन र लुका मोड्रिचले सम्झौता नविकरण गरेका कारण उनको भविष्य रियलमा स्पष्ट छैन ।

हामेस : सुरुवात उत्कृष्ट, निरन्तरता कमजोर

रियल म्याड्रिडबाट एभर्टन पुगेलगत्तै सिजनको सुरुवातमा हामेसले सानदार प्रदर्शन गरे । आफ्नै पूर्व प्रशिक्षक कार्लो एन्चेलोटीको नेतृत्वमा उनले टोलीलाई लगातार राम्रो नतिजा दिलाए । उनको प्रदर्शन हेर्दा उनी लयमा फर्किएको लख काटिएको थियो । तर त्यो लामो समय टिकेन ।

राष्ट्रिय टोलीमा लगातार खराब प्रदर्शन र चोटका कारण उनी अहिले संघर्ष गरिरहेका छन् । उनको पछिल्लो प्रदर्शनले उनको एकरुपतामा प्रश्न उठ्न थालेको छ । जिदानले हामेसलाई रियलबाट पठाउनुको मुख्य कारण पनि यहि नै थियो भन्ने अनुमान लगाउन सकिन्छ ।

बेल : अझै पनि चोटसँग जुध्दै

रियल म्याड्रिड छोडेर टोटेनहम आउँदा बेल घाइते थिए । त्यसकारण पनि उनको सुरुवात कस्तो हुन्छ भन्ने हेर्न लामो समय कुर्नुपर्यो । सिजनको आधा भाग आइपुग्दा पनि बेल पूर्ण रुपमा फिट हुन सकेका छैनन् । लगातार टोलीमा परेपनि पहिलो रोजाइमा स्थान पक्का गर्न असफल भएका छन् ।

बेलले प्रिमियर लिग, कराबाओ कप र युरोपा लिग तीनै प्रतियोगितामा गोल गरेका छन् । तर उनीबाट जुन स्तरको प्रदर्शन अपेक्षा गरिएको थियो, त्यो भने आउन सकेको छैन । हाल चोटका कारण पुन: विश्राममा रहेका उनको भविष्य अब टोटेनहममै पनि रहन्छ वा रहँदैन भन्ने शंका उत्पन्न भएको छ ।