एजेन्सी – आन्सु फाती १८ वर्षे पुग्ने क्रममा रहँदै गर्दा बार्सिलोनाको पहिलो रोजाईको टोलीमा नियमित रहन सफल भएका थिए ।

फातीले सल्लाहका लागि आफू अन्य व्यक्तिहरुसँग निर्भर रहेको बताएका छन् । युवा खेलाडीलाई सल्लाह दिने विषयमा फरवार्ड फातीले दुई वटा सामान्य जवाफ दिएका छन् । ‘म कसैलाई सुझाव दिने अवस्थामा छैन । म आफैं अरुको सल्लाहको आवश्यकता महसुस गर्छु,’ फातीले भने, ‘तर यदि दिनै पर्ने अवस्था आए म भन्छु । रमाइलोका लागि फुटबल खेलौं र यसमा रमाउ ।’

फाती बार्सिलोनाको एकेडेमी ला मासियाबाट आएका खेलाडी हुन् । सिनियर टोलीमा स्थान बनाउनुअघि आफ्नो परिचय उनले त्यहिबाट दिएका थिए । ‘म र मेरो परिवारका लागि ला मासिया धेरै महत्वपूर्ण रह्यो,’ उनले थपे, ‘म र मेरो दाजु फुटबलहरुको बीचमा हुर्केका हौं । हामीलाई शिक्षक, त्यहाँका कर्मचारी र एकेडेमीका प्रशिक्षकहरुबाट धेरै सहयोग पायौं ।’

ला मासियाको के कस्ता सम्झना छ भनेर सोध्दा उनले थपे, ‘धेरै सम्झना छन् । त्यसमध्ये केहि विषेश छन् । एकेडेमीका अन्य साथीहरुसँगै बसमा स्कुल जान्थ्यौं । मध्यान्यमा फर्कन्थ्यौं,’ उनले थपे, ‘सँगै खान्थ्यौं । अनि त्यसपछि फुटबल प्रशिक्षणमा जुट्थ्यौं । त्यसकै आधारमा हामी अहिले फुटबल खेलिरहेका छौं ।’