एजेन्सी – मिडफिल्डर पाउल पोग्बा म्यानचेस्टर युनाइटेड छाड्न चाहिरहेका छन् । सरुवा बजार खुल्ने समयमा फेरि एकपटक पोग्बाको सरुवाको चर्चा सुरु भएको छ ।

फ्रान्सेली मिडफिल्डर पुन: एकपटक आफ्नो पूर्वक्लब युभेन्ट्स फर्कने विषयमा पनि चर्चा चलेको छ । तर इटालियन क्लबले उनीमाथि खासै चासो दिएको छैन । रियल म्याड्रिड प्रशिक्षक जिनेदिन जिदान पोग्बा प्रति लामो समयदेखि सकारात्मक रहँदै आएका छन् । तर म्याड्रिड क्लबले पनि पोग्बाको पछिल्लो प्रदर्शनका कारण त्यति महत्त्व दिने देखिदैन ।

यसअघि पनि पोग्बा युभेन्ट्स वा रियल जाने विषयमा चर्चा भएको थियो । त्यति बेला युभेन्ट्सले युनाइटेडसँग खेलाडी साट्न चाहेको थियो । तर, प्रिमियर लिग टोलीले भने खाली पैसाको मात्र कारोवार गर्न चाहेको थियो । त्यसबेला १ सय मिलियन युरो माग गरेको युनाइटेड अहिले भने ५० देखि ५५ मिलियन युरोमा बेच्न समेत सहमत देखिएको छ ।

युभेन्टस छाडेर युनाइटेड आएदेखि पोग्बाले निरन्तर अपेक्षित प्रदर्शन गर्न सकेका छैनन् । अहिले त उनी टोलीको पहिलो रोजाइमा समेत नियमित रहेका छैनन् । उनले क्लब छाड्ने मनसाय बनाएकाले पनि युनाइटेड अब जोखिम मोल्न चाहदैन । सन् २०२२ मा सम्झौता अवधि समाप्त हुने कारण पनि युनाइटेड उनीबाट ट्रान्सफर रकम जोड्न चाहन्छ ।

दुवै रियल म्याड्रिड र युभेन्टस दुई सिजन अघिसम्म पोग्बालाई मुख्य लक्ष्य बनाएर सरुवा बजारमा अघि सरेका थिए । अहिले समयसँगै दुवै टोलीले सेन्टर मिडफिल्डलाई बलियो बनाएको अवस्था छ । अझ कोरोना भाइरसको कारण आर्थिक अवस्था कमजोर रहेकोले दुवै टोली पोग्बालाई मोटो रकम खर्चने पक्षमा छैनन् ।