एजेन्सी – केहि समय अघि पेरिस सेन्ट जर्मेन (पिएसजी) का सुपर स्टार नेयमारले पूर्व सहकर्मी बार्सिलोनाका लिओसनल मेस्सीसँग अर्को सिजनसँगै खेल्ने इच्छा व्यक्त गरेका थिए ।

बार्सिलोनासँग मेस्सीको सम्झौता सन् २०२१ को जुनमा सकिँदैछ । त्यहि सेरोफेरोमा नेयमारले आफ्नो चाहना व्यक्त गरेका थिए । यद्दपी नेयमारले कुन क्लबमासँगै खेल्न चाहेको भन्न चाहेनन् । कतिपयले भने नेयमारले पिएसजीमैसँगै खेल्न चाहेको संकेत गरेको अनुमान गरेका थिए ।

‘म मेस्सीसँग फेरिसँगै मैदानमा उत्रन चाहन्छु,’ नेयमारले भनेका थिए, ‘म उनीसँग खेल्न चाहन्छ । मलाई आशा छ अर्को वर्ष त्यो इच्छा पूरा हुनेछ ।’ मेस्सीले आफ्नो पछिल्लो अन्तवार्तामा नेयमारको चाहनाका बारेमा पनि बोलेका छन् ।

तर बार्सिलोनाले फेरि उनलाई भित्राउने सम्भावना भने कम रहेको बताएको थियो । क्लबको आर्थिक कारणले संघर्ष गरिरहेका कारण त्यो सम्भव नहुने मेस्सीको भनाई थियो ।

‘स्तरीय खेलाडी ल्याउन कठीन छ । किनकी क्लबसँग पैसा छैन,’ उनले भने, ‘सबै उपाधिका लागि प्रतिस्पर्धा गर्न हामीले थुप्रै ठूला खेलाडी ल्याउनुपर्ने हुन्छ । तर हामी पैसा तिर्न सक्दैनौं । नेयमार निकै महँगा खेलाडी हुन् कसरी पिएसजीलाई तिर्नु ?’

नेयरमाले अर्को वर्ष सँगै खेल्न चाहेको बताएका विषयमा मेस्सीले भने, ‘हामीबीच अहिले पनि राम्रो सम्बन्ध छ । मलाई थाहा छैन उनले सँगै खेल्ने बारेमा के भने’, ३३ वर्षे मेस्सीले भने, ‘उनले भनेका हुनसक्छन् । तर, किन उनले त्यसो भने त्यो पनि उनलाई नै सोध्नुपर्ने हुन्छ ।’

उनले आफूहरुबीच सम्बन्ध अझै राम्रो रहेका विषयमा थपे,’ ‘हाम्रो ह्वाट्सएप ग्रुप छ । त्यसमा लुइस सुआरेज पनि छन् । समय समयमा कुरा म्यासेज हुन्छ । पछिल्लो पटक हामीले च्याम्पियन्स लिगको खेलतालिकाका बारेमा म्यासेज गरेका थियौं । हामी अहिले नै एकअर्काको सामना गर्न चाहदैन थियौं । उनीहरु पनि बार्सिलोनालाई चाहदैनथे । किनकी हामी अहिले राम्रो लयमा छैनौं । इतिहास हेरेर हामीले एकअर्कालाई सम्मान गर्छौ । खेलमा पनि त्यो हार्दिकता छ ।’

नेयमारले त्यसो भनिरहँदा मेस्सीले बार्सिलोना छाड्न वा नछाड्ने विषयमा केहि बोलेका छैनन् ।