एजेन्सी – क्रिस्टियानो रोनाल्डोले गत साता युभेन्टसका लागि दुई गोल गर्दै अधिकारिक प्रतियोगितामा गोल संख्या ७ सय ५८ पुर्याए । रोनाल्डोले उक्त उपलब्धि हासिल गर्ने क्रममा पेलेको ७ सय ५७ गोलको कीर्तिमान तोडेका थिए ।

यद्यपि पेलेको सामाजिक संजाल इन्स्टाग्रामको बायोमा भने आफुले १,२८३ गोल गरेको उल्लेख गरिएको छ । सामाजिक संजालसँगै मिडियामा पेलेले उक्त तथ्यांक रोनाल्डोले गोलको कीर्तिमान तोडेपछि मात्र राखेको भन्ने आरोप लागेको थियो । ब्राजिलियन दिग्गज पेलेले उक्त आरोपको खण्डन गरेका छन् । ८० वर्षीय पूर्व विश्वकप विजेताले उक्त तथ्यांक आफूले सुरुदेखि राखेको बताएका छन् ।

‘मैले आफ्नो इन्स्टाग्रामको बायो परिवर्तन गरेर अन्य खेलाडीको उपलब्धि छायाँमा पर्न खोजेको बारेमा पढें । म यो प्रष्ट पार्न चाहन्छु की त्यो तथ्यांक मैले सुरुवाती दिन देखि नै राख्दै आएको थिएँ । यी ठुला खेलाडीको कीर्तिमानलाई यस्तो सानो पक्षले अल्झाउनु हुँदैन,’ पेलेले आफ्नो ट्वीटरमा लेखेक छन् ।

Eu fui acusado por parte da imprensa de ter mudado a bio do meu Instagram, para ofuscar essas grandes estrelas que estão quebrando meus recordes. O texto da bio sempre foi o mesmo, desde que entrei na plataforma. Nada disso deveria nos distrair das suas conquistas incríveis.

— Pelé (@Pele) January 6, 2021

त्यसो त पेलेले एकै क्लबका लागि गरेको सर्वाधिक गोलको कीर्तिमान गत महिना मात्र बार्सिलोनाका कप्तान लिओनेल मेस्सीले तोडेका थिए । मेस्सीले ६ सय ४४ गोल पूरा गर्दै पेलेसँग बराबरी गरेलगत्तै ब्राजिलियन क्लब सान्तोसले उक्त तथ्यांक गलत भएको भन्दै विज्ञप्ति जारी गरेको थियो । यसबारे भने पेलेले व्यक्तिगत धारणा दिएका छैनन् ।

विश्व फुटबलमा सर्वाधिक अधिकारिक गोल गर्ने कीर्तिमान जोसेफ बिकानको नाममा छ । चेकका फरवार्ड बिकानले ८ सय ५ गोल गरेको तथ्यांक रहेको छ ।

यो पनि : पेलेभन्दा मेस्सी पछि रहेको सान्तोसको दावी