एजेन्सी – रियल म्याड्रिडका बेल्जियन मिडफिल्डर इडेन हाजार्डले आफ्नो ३० औं जन्मदिन मनाउने क्रममा उपहारका रुपमा के चाहेको भन्ने प्रश्नमा तीन खेलाडीको तीन विशेषता चाहेको बताएका छन् ।

हाजार्डले बार्सिलोनाका कप्तान लिओनेल मेस्सीको बायाँ खुट्टा, क्रिस्टियानो रोनाल्डोको जितका लागि चाहना र जिनेदिन जिदानको स्तर चाहेको बताएका छन् । हाजार्डले मेस्सी र रोनाल्डोको प्रशंसा समेत गरेका थिए । उनले आफ्नो पनि स्तर राम्रो रहेको तर जिदान जस्तो हुने चाहना रहेको बताए ।

हाजार्डले भिडियो असिस्टेन्ट रेफ्री (भीएआर) को बारेमा समेत बोल्दै आफूले चाहेको हुने भए खेलमा भीएआर नराख्ने बताए । ‘ यसले फुटबलबाट रमाइलो नै खोसेको छ । हामीले गोल गरेपछि पनि मान्य हुन्छ वा हुँदैन भनेर सोच्नुपर्छ । हो यसले केहि गल्ति सुधार गरेको छ तर फुटबलको जुन सुन्दरता छ, त्यसमा कमी पक्कै ल्याएको छ,’ हाजार्डले भने ।

हाजार्डले कहिलेसम्म फुटबल खेल्ने भन्ने प्रश्नमा आफ्नो शरीरले दिएसम्म खेलमा रहने जानकारी दिए । ‘मेरो शरीर चोटमुक्त भएसम्म म खेल्नेछु । यसै हिसाबले चोट लाग्दै जाने हो भने म ३५ वर्षपछि खेल्न सक्छु भन्ने लाग्दैन । तर बुढो हुँदै गएपछि एकै स्तरमा खेल पनि सकिन्न । जहिले छोडेपनि खेलाडी हुन् होला, तर फुटबलमा नै रहन्छु,’ उनले भने ।