एजेन्सी – इटालियन सिरी ‘ए’ मा नेपोली र रोमाले सहज जित निकालेको छ । घरेलु मैदानमा नेपोलीले पार्मामाथि २–० को सहज जित निकालेको हो ।

नेपोलीको जितमा इल्जिफ इल्मास र माटियो पोलिटानोले गोल गरे । पहिलो र दोस्रो हाफमा समान एक–एक गोल भएको थियो । डिएगो अर्मान्डो म्याराडोना स्टेडियममा आइतबार राति भएको खेलमा घरेलु टोलीले खेलको ३२औं मिनेटमा इल्जिफ इल्मासको गोलबाट अग्रता लिएको थियो । उनले डिएगो डिम्मीको पासमा गोल गरेका थिए ।

८२औं मिनेटमा माटियो पोलिटानोले गोल गर्दै नेपोलीलाई २–० को जित दिलाए । यो जितसँगै नेपोली १९ खेलबाट ३७ अंक जोडेर पाँचौ स्थानमा यथाव रहेको छ । पार्मा १३ अंक जोडेर १९औं स्थानमा छ ।

यस्तै सिरी ‘ए’ कै अर्काे खेलमा रोमाले हेलास भेरोनालाई ३–१ ले हराएको छ । रोमाको जितमा जियानलुका मान्सिानी, हेनरिक मिखटरयान र बोर्जा मायोरलले गोल गरे । भेरोनाका इब्रिमा कोलेले एक गोल फर्काए ।

जितसँगै रोमा २० खेलबाट ४० अंक जोडेर तेस्रो स्थानमा उक्लिएको छ । हेलास भेरोना ३० अंक जोडेर नवौं स्थानमा छ ।

यस्तै सिरी ‘ए’ कै अर्काे खेलमा एटलान्टा लाजियोसँग ३–१ ल पराजित भएको छ । लाजियोको जितमा एडाम मारुसिस, जोआक्विन कोरेआ र भेडाट मुरिकिले गोल गरे । एटलान्टाका मारियो पासालिसले एक गोल फर्काए ।

जितसँगै लाजियो ३७ अंक जोडेर छैटौ स्थानमा उक्लदा एटलान्टा ३६ अंक जोडेर सातौ स्थानमा झरेको छ ।