एजेन्सी – कोपा इटालियाको सेमिफाइनलको पहिलो लेगमा आज राति इन्टर मिलान र युभेन्टसबीच प्रतिस्पर्धा हुँदैछ । खेल इन्टर मिलानको मैदानमा नेपाली समयअनुसार राति १ः४५ बजे हुनेछ ।

घरेलु मैदानमा हुने पहिलो लेगमा युभेन्टसलाई हराउदै इन्टर फाइनल यात्रा मजवुत बनाउने दाउमा हुनेछ । इन्टर मिलानसँग रोमेलु लुकाकु, लोउटारो मार्टिनेज, क्रिस्टियन इरिक्सन, निको बरेल्ला, अचरफ हाकिमी, इभान पेरिसिस, एलेसान्द्रो बास्टोनी र गोलरक्षक समिर हान्डानोभिचको साथ रहेको छ । इन्टर मिलानले क्वाटरफाइनलमा एसी मिलानलाई २–१ ले पराजित गर्दै अन्तिम चारको यात्रा तय गरेको थियो ।

यता, युभेन्टस पनि इन्टरलाई उसकै मैदानमा हराउँदै फाइनल यात्रा मजबुत बनाउने दाउमा हुनेछ । टोलीसँग सुपरस्टार फरवार्ड क्रिस्टियानो रोनाल्डो, अल्भारो मोराटा, फेडरिको चिइसा, जुआन कोर्डाडो, वेस्टन म्याकिन्नी, अर्थर, रोड्रिगो बेन्टानकर, डानिलो, जर्जियो चिलियानी, लियोनार्दाे बोनुची र गोलरक्षक वजसिएच सेजेस्नीको साथ रहेको छ । पाउलो डिब्याला चोटका कारण टोलीमा हुनेछैन ।

यि दुई टोलीबीचको पछिल्लो २५ भेटमा युभेन्टस १३ खेलमा विजयी हुदा इन्टरले चार खेल जितेको छ । ८ खेल बराबरीमा सकिएको छ । इन्टरले गत जनवरीमा युभेन्टसलाई २–० ले पराजित गरेको थियो । इन्टर सोही जितलाई निरन्तरता दिने लक्ष्यमा रहँदा युभेन्टस उक्त हारको बदला लिने दाउमा हनेछ ।

दोस्रो लेग १० फेब्रुअरीमा युभेन्टसको मैदानमा हुनेछ । अर्काे सेमिफाइनलमा बुधबार राति नेपोली र एटलान्टाबीच प्रतिस्पर्धा हुनेछ । दोस्रो लेग ११ फेब्रुअरीमा हुनेछ ।