एजेन्सी – इंग्लिस प्रिमियर लिगमा आज राति विभिन्न चार खेलमा प्रतिस्पर्धा हुँदा शीर्षस्थानमा रहेको म्यानचेस्टर सिटी लिभरपुलको भ्रमणमा निस्कदैछ ।

लिभरपुल र सिटीबीचको खेल एनफिल्डमा नेपाली समयअनुसार राति १०ः१५ बजे हुनेछ । घरेलु मैदान हुने खेलमा लिभरपुल सिटीलाई हराउदै अंक तालिका सुधार गर्ने लक्ष्यमा हुनेछ ।

पछिल्लो खेलमा औसतको प्रदर्शन गरेका लिभरपुल सिटीलाई हराउदै जितको लय पक्रने दाउमा हुनेछ । लिभरपुलले पछिल्लो पाँच खेलमा दुई जित निकाल्दा ३ खेलमा हार बेहोरेको छ । अघिल्लो साता लिभरपुल ब्राइटनसँग १–० ले स्तब्ध बनेको थियो ।

उक्त हारलाई बिर्संदै लिभरपुल अघि बढ्ने सोचमा हुनेछ । टोलीसँग साडियो माने, मोहम्द सलाह, रोबर्टाे फिर्मिनो, जोर्डन हेन्डरसन, जर्जिन्हो वाइनाल्डम, थियागो अलकान्तरा, एन्ड्रु रोबर्टसन, फाविन्हो, एलेक्सान्डर अर्नाेल्ड, ओजान कावाक र गोलरक्षक इलिसन बेकर हुनेछन् ।

चोटका कारण गोलरक्षक बेकरले खेल्ने सम्भावना न्युन रहेको छ । यस्तै टोलीसँग डिभोक ओरिगी, कर्टिस जोन्स र अक्सलेड चेम्वरलेन पनि रहेको छ ।

यता, पछिल्लो २० खेलसम्म अपराजित रहेको सिटी लिभरपुललाई उसकै मैदानमा हराउदै अपराजित यात्रालाई निरन्तरता दिदै आफ्नो शीर्षता थप पकड बनाउने लक्ष्यमा हुनेछ ।

सिटी २१ नोभेम्वर २०२० मा टोटेनहमसँग २–० ले पराजित भएयता अपराजित छ । जसमा १७ जित र ३ बराबरीको नतिजा छ । शीर्षस्थानमा रहेको सिटीको २१ खेलबाट ४७ अंक रहेको छ ।

टोलीसँग गाब्रियल जेसस, फिल फोडेन, बर्नाडो सिल्भा, रहिम स्टर्लिङ, इल्केए गुन्डोगान, फर्नाडिन्हो, जिन्चेन्को, रुवेन डियास, जोन स्टोन्स, केएल वाल्कर र गोलरक्षक इडर्सन मोराएस रहेका छन् । यस्तै टोलीसँग रोड्री, एमरिक लापोर्ट र जोओ क्यान्सिलो पनि रहेको छ ।

यि दुई टोलीबीचको पछिल्लो २९ खेलको नतिजामा लिभरपुल १२ खेलमा विजयी भएको छ । ७ खेल सिटीले आफ्नो पक्षमा पार्दा १० खेल बराबरीमा सकिएको छ । यि दुई टोलीले पछिल्लो पटक १–१ गोलको बराबरी खेलेका थिए । त्यसअिघ सिटीले ४–० को जित निकालेको थियो ।

अन्य खेल : टोटेनहमविरुद्ध वेस्ट ह्याम (साँझ ५ः४५ बजे), वल्भ्सविरुद्ध लेस्टर (राति ७ः४५ बजे), सेफिल्डविरुद्ध चेल्सी (राति १ः०० बजे)