एजेन्सी – स्पेनिस ला लिगामा क्याटलान क्लब बार्सिलोनाले रियल बेटिसलाई उसकै मैदानमा ३–२ ले पराजित गरेको छ ।

बार्सिलोनाले एक गोलले पछि परेको अवस्थामा पूनरागमन जित हात पारेको हो । बार्सिलोनाको जितमा कप्तान लियोनेल मेस्सी र ट्रिन्काओले गोल गर्दा एक गोल उपहार पाएको थियो । बेटिसका बोर्जा इग्लिसियस र भिक्टर रुइजले गोल गरेपनि हार टार्न सकेन ।

बेटिसमा आइतबार राति भएको खेलको ३८औं मिनेटमा घरेलु टोलीले बोर्जा इग्लिसियसको गोलबाट अग्रता लिएको थियो । उनले इमर्सनको पासमा गोल गरेका थिए । ५९औं मिनेटमा सब्सिच्युट लियोनेल मेस्सीले गोल गर्दै खेललाई १–१ गोलको बराबरीमा ल्याए । मेस्सी ५७औं मिनेटमा रिकी पुचको स्थानमा मदान प्रवेश गरेको थियो ।

६८औं मिनेटमा भिक्टर रुइजले आत्मघाती गोल गरेपछि बार्सिलोनाले खेलमा २–१ को अग्रता सलन सफल भयो । ७५औं मिनेटमा नविल फेकिरको पासमा भिक्टर रुइजले गोल गर्दै खेललाई २–२ गोलको बराबरीमा ल्याए । खेल सकिन ३ मिनेट बाँकी रहँदा ट्रिन्काओले गोल गर्दै बार्सिलोनालाई ३–२ को संघर्षपुर्ण जित दिलाए ।

यस जितसँगै बार्सिलोना २१ खेलबाट ४३ अंक जोडेर दोस्रो स्थानमा उक्लिएको छ । समान ४३ अंक भएपनि रियल म्याड्रिड गोल अन्तरमा तेस्रोमा रहेको छ । पराजित बेटिस ३० अंकसहित सातौ स्थानमा रहेको छ । शीर्षस्थानमा रहेको एट्लेटिको म्याड्रिडको १९ खेलबाट ५० अंक छ ।