काठमाडौं (हाम्रो खेलकुद) – उपाधि होडमा रहेको विभागीय त्रिभुवन आर्मी फुटबल क्लबले वालिङ नगरपालिका स्याङ्जालाई २–० ले पराजित गरेको छ ।

आर्मीको जितमा शर्मिला थापाले एक गोल गर्दा एक गोल उपहार पाएको थियो । यो जितसँगै आर्मीले शीर्षस्थानमा रहेको एपिएफसँगको अंक दुरी छोट्याएको छ । आर्मीको ८ खेलबाट १९ अंक पुगेको छ । शीर्षस्थानमा रहेको एपिएफको २१ अंक छ । एपिएफले एक खेल कम खेलेको छ । पराजित वालिङ ११ अंक जोडेर तेस्रो स्थानमा रहेको छ ।

खेलको पहिलो मिनेटम शर्मिला थापाले गोल गर्दै आर्मीलाई १–० ले अघि बढाईन् उनले इन्दिरा राईको पासलाई सहजै गोलमा परिणत गरेकी थिइन् । १४औं मिनेटमा मेथो एलुड रुथको प्रहारलाई आर्मीकी गोलरक्षक अन्जना रानामगरले पञ्च गर्दै बचाईन् ।

२७औं मिनेटमा बिमला चौधरीको प्रहार पोलमा लागेर फर्कदा आर्मी अग्रता दोब्बर पार्नबाट चुक्यो । ४२औं मिनेटमा पुष्पा गुरुङले आत्मघाती गोल गरेपछि आर्मीले खेलमा २–० को अग्रता लिन सफल भयो । उनले सपना लामाको क्रसलाई बिमला चौधरीले प्रयास गर्दा पुष्पालाई लाग्दै गोलमा परिणत भएको थियो । ४४औं मेथो एलुडले तीन डिफेन्डरलाई बिट गर्दै प्रहार गर्न ढिला गर्दा सुनिता चौधरीले क्लियर गरिदिइन् ।

८४औं मिनेटमा वालिङ १० खेलाडीमा समेटियो । सपना लामालाई फल गरेपछि रेफ्री रोजेन्द्र खड्गीले कियोमेग्ने जोमो भेनेसा नोइल्लीलाई दोहोरो पहेलो कार्ड देखाउदै मैदान बाहिर पठाए । त्यसपछि थप गोल निस्कन नसक्दा आर्मी विजयी हुन सफल भयो ।