काठमाडौं (हाम्रो खेलकुद) – फरवार्ड निरु थापाको दुई गोल सहयोगमा विभागीय नेपाल पुलिस क्लबले राष्ट्रिय महिला लिगमा बिराटनगर महानगरपालिका मोरङमाथि ३–० को सहज जित हात पारेको छ ।

एन्फा कम्प्लेक्सको खेल मैदानमा मंगलबार भएको खेलमा पुलिसको जितमा थप एक गोल निर्मला उपाध्ययले गरिन् । यससँगै पुलिसले पहिलो राउन्डमा भोगेको हारको बदला लिन सफल भएको छ । पुलिस पहिलो राउन्डमा १–० ले स्तब्ध भएको थियो ।

खेलको २३औं कप्तान घिम कुमारी गुरुङको फ्रिकिकमा निरु थापाको फ्रि हेडर पोस्टनजिकैबाट बाहिरियो । ३१औं मिनेटमा निर्मला बिकेको प्रहारलाई बिराटनगरकी कप्तान कल्पना कार्कीले बचाईन् ।

४१औं मिनेटमा निर्मला उपाध्ययले गोल गर्दै पुलिसलाई १–० को अग्रता दिलाईन् । निर्मला उपाध्यय र निर्मला बिकेको समन्वयमा बनेको मुभमा उपाध्ययको प्रहार डिफ्लेक्ट भएर गोलमा परिणत हुदा गोलरक्षक कल्पना कार्कीले रोक्ने कुनै मौका नै पाइनन् ।

५७औं मिनेटमा निरु थापाले गोल गर्दै आर्मीको अग्रता दोब्बर पारिन् । निर्मला उपाध्ययको प्रहारलाई गोलरक्षक कल्पना कार्कीले राम्ररी नियन्त्रणमा लिन नसकेको बललाई निरुले जाली चुमाएकी थिइन् ।

६०औं मिनेटमा निरु थापाले व्यक्तिगत दोस्रो तथा टोलीका लागि तेस्रो गोल गर्दै पुलिसलाई ३–० को सहज जित दिलाइन् । पेनाल्टी बक्समा सरिता शेर्पाले क्लियर गर्न नसकेको बललाई निरुले जाली चुमाएकी थिइन् ।

यस जितसँगै पुलिस ८ खेलबाट ११ अंक जोडेर चौथो स्थानमा उक्लिएको छ । वालिङसँग समान ११ अंक रहेपनि हेड टु हेडमा पुलिस पछि परेको हो । पहिलो राउन्डमा यि दुई टोलीले पहिलो राउन्डमा १–१ गोलको बराबरी खेल्दा दोस्रो राउन्डमा वालिङ १–० ले विजयी भएको थियो । पराजित विराटनगर ८ खेलबाट १० अंक जोडेर पाँचौ स्थानमा झरेको छ ।

लिगमा बुधबार चन्द्रपुर नगरपालिका रौतहट र नेपाल एपिएफ क्लबबीच दिउँसो २ बजे प्रतिस्पर्धा हुनेछ ।