काठमाडौं (हाम्रो खेलकुद) – सावित्रा भण्डारी ‘साम्वा’ दोहोरो ह्याट्रिक र अनिता बस्नेतको दुई गोल सहयोगमा अपराजित रहेको नेपाल एपिएफ क्लबले चन्द्रपर नगरपालिका रौतहटमाथि ८–० को फराकिलो जित निकालेको छ ।

पहिलो राउन्डमा एपिएफले ६–० को फराकिलो जित निकालेको थियो । दोस्रो राउन्डमा पनि जितको लयलाई निरन्तरता दिदा चन्द्रपुरको एपिएफको दवाव झेल्न सकेन ।

खेलको पहिलो मिनेटमा नै एपिएफले कप्तान अनिता बस्नेतको पासमा गोल गर्दै एपिएफलाई १–० को अग्रता दिलाइन् ।

छैटौ मिनेटमा सावित्राले गोल गर्दै एपिएफको अग्रता दोब्बर पारिन् । ३३ मिनेटमा सावित्राले व्यक्तिगत दोस्रो तथा टोलीका लागि तेस्रो गोल गरेपछि एपिएफले पहिलो हाफमा ३–० को अग्रता लिन सफल भयो । सुस्मा महर्जनले डिबक्स बाहिर ह्याण्ड गरेपछि पाएको फ्रिकिकलाई साबित्राले सदुपयोग गरिन् ।

४७औं मिनेटमा सावित्राले गोल गर्दै हयाट्रिक पुरा गरिन् । ५४औं मिनेटमा अनिताले व्यक्तिगत दोस्रो तथा टोलीका लागि पाँचौ गोल गरिन् । ६०औं मिनेटमा सावित्राको गोलमा एपिएफले खेलमा ६–० को अग्रता लिन सफल भयो ।

६२औं मिनेटमा सावित्राले व्यक्तिगत पाँचौ गोल गरिन् । ७९औं मिनेटमा सावित्राले दोहोरो ह्याट्रिक पुरा गर्दा एपिएफले खेलमा ८–० को आरामदायी अग्रता लिन सफल भयो ।

यो जितसँगै अपराजित रहेको एपिएफको उपाधि यात्रालाई बलियो बनाउदा दोस्रो स्थानमा रहेको आर्मीलाई ५ अंकले पछि पारेको छ । एपिएफको ८ खेलबाट २४ अंक छ ।

एपिएफले लिगको आठौं चरण सकिदा ६५ गोल गर्दा एक गोल पनि खाएको छैन । दोस्रो स्थानमा रहेको आर्मीको १९ अंक छ । पराजित चन्द्रपुर ८ खेलबाट ६ अंक जोडेर छैटौ स्थानमा रहेको छ ।

लिगमा बिहीबार दुई खेल हुनेछ । पहिलो खेलमा चौदन्डीगढी नगरपालिका उदयरपुर र वालिङ नगरपालिका स्याङ्जा तथा दोस्रो खेलमा त्रिभुवन आर्मी फुटबल क्लब र बिराटनगर महानगरपालिका मोरङबीच प्रतिस्पर्धा हुनेछ ।