विराटनगर (हाम्रो खेलकुद) – झापा फुटबल क्लब प्रथम प्रदेश स्तरिय नकआउट फुटबल प्रतियोगिताको सेमिफाइनलमा पुगेको छ ।

सुन्दर हरैचामा सञ्चालित प्रतियोगितामा आइतबार पूर्वाञ्चल एपिएफ सुनसरीलाई सडन डेथमा पराजित गर्दै झापा अन्तिम ४ मा पुगेको हो । निर्धारित समय १–१ गोलको बराबरीपछि खेल टाइब्रेकरमा गएको थियो ।

टाइब्रेकरमा पनि बराबरी भएपछि खेल सडन डेथमा धकेलिएको थियो । झापा ६–४ ले विजयी भएको थियो । २६ औं मिनेटमा मौसम सुब्बाको गोलबाट झापाले अग्रता लिएको थियो । उज्वल राईले ५४ औं मिनेटमा पेनाल्टी गोल गरेपछि खेल बराबरीमा पुगेको थियो ।

टाइब्रेकरमा झापाका लागि श्याम मुरम, अभिषेक गुरुङ, सरोज कार्की, सञ्जिव राई, सञ्जय गुरुङ र रोमन भुजेलले गोल गरे । प्रमोद चौधरी, मौसम सुब्बा र सञ्जिव बुढाथोकीले भने गोल गर्न सकेनन् ।

एपिएफका लागि उज्वल राई, सन्तोष कटुवाल, नवीन चौधरी, सविन थापा र गोविन्द बस्नेतले गोल गरे । शारद राईको प्रहार पोष्ट नजिकबाट बाहिरिएको थियो । त्यस्तै हरि कार्की, योगेश मगर र सुजन चौधरीको प्रहारलाई विपक्षी गोलकिपरले रोकेका थिए ।

झापाका गोलकिपर सञ्जय गुरुङ म्यान अफ दि म्याच घोषित भएका थिए । नेपाली कांग्रेस महा समिति सदस्य सुन्दर हरैचा नगरपालिका ललीत श्रेष्ठले सञ्जयलाई २ हजार १ सय रुपैयाँ हस्तान्तरण गरे ।

प्रतियोगितामा सोमबार हुने तेस्रो क्वार्टरफाइनलमा आयोजक झरना युवा क्लब र मोरङको लेटाङ फुटबल क्लबबीच प्रतिस्पर्धा हुनेछ । प्रतियोगिताको विजेता टोलीले १ लाख १ हजार १ सय ११ रुपैयाँ र दोस्रो हुने टोलीले ५१ हजार १ सय ११ रुपैयाँ प्राप्त गर्नेछ ।