एजेन्सी – यूईएफए च्याम्पियन्स लिग अन्तर्गत मंगलबार राती किलियन एमबाप्पेले आफ्नो उदाउँदो करीअरमा अर्को यादगार खेल थपे । बार्सिलोनाको मैदान क्याम्प नोउमा एमबाप्पेले ह्याट्रिक प्रहार गरेपछि पिएसजी ४-१ ले विजयी रहयो ।

एमबाप्पेको खेल्ने शैली र प्रदर्शनलाई लिएर उनी अब छिट्टै विश्वको सर्वोत्कृष्ट खेलाडी बन्दैछन् भन्नेमा सायदै दुइमत होला । करिआरको सुरुवात दिनदेखि नै उनको नाम क्रिस्टियानो रोनाल्डोसँग दाँजिएको थियो । एमबाप्पेले आफैं पनि पटक पटक रोनाल्डोको खुलेर प्रशंसा गर्दै आफू उनको खेलबाट प्रभावित भएको स्वीकारेका छन् ।

मंगलबार एमबाप्पेले बार्सिलोनाविरुद्ध गोल गरेपछि खुसियाली मनाउने क्रममा देखाएको हाउभाउले पनि त्यसमा थप जोड दिएको छ । रोनाल्डो आफैंले पनि रियल म्याड्रिडको जर्सीमा खेल्दा बार्सिलोनाविरुद्ध थुप्रै खेल खेले । उनले क्याम्प नोउमा पनि गोल गरेका छन् ।

एमबाप्पेले पनि मंगलबार क्याम्प नोउमा गोल गर्दा रोनाल्डोले सोहि मैदानमा गरेको गोलको खुसियाली देखाए । रोनाल्डोले रियल म्याड्रिड र युभेन्टसबाट खेल्दा क्याम्प नोउमा जुन जुन सेलेब्रेसन गरेका छन्, एमबाप्पेले त्यहि दोहोर्याए ।

स्टार फरवार्ड नेयमारको अनुपस्थितिमा पिएसजीको आक्रमण कमजोर हुने अपेक्षा गरिएको थियो । तर एमबाप्पेले सानदार प्रदर्शन गर्दै सबैलाई प्रभावित बनाए । बार्सिलोनाका डिफेन्डर जेरार्ड पिके, क्लेमेन्ट लेंगलेट र सर्जिनो डेस्टका लागि बिर्सनलायक खेल रहयो ।

एमबाप्पेले क्याम्प नोउमा गोल पनि गरे, गोलको खुसियाली पनि रोनाल्डो शैलीमा मनाए र अब रियल म्याड्रिडसँग निकटता बढ्दै जाँदा उनले रोनाल्डोझैं भविष्य पनि सोहि क्लबमा देखेका छन् । उनले पिएसजी छाडेपछि रियल नै गन्तव्य हुने पक्का छ, अब प्रश्न छ कहिले ?